Жагьилтал армиялийн буцлан бивкIунни

Республикалул аьрали комиссариатрай хьунни интнил призыврацIун дархIусса пресс-конференция.

Андриана Аьбдуллаев
Дагъусттаннал аьрали коми­ссар Дайтбаг Мусттапаевлул бувсунни Дагъусттанная аьралуннаву къуллугъ буллан 3 азара да­гъусттанчу гьантIишиву, миннава ва ххуллух тIайла уккан­тIишиву азара инсан. Му бакъассагу, республикалия гьарца шинах азарунния ливчусса инсантал гьан буллай бур контрактрай къуллугъ бангу.

Аьмну аьралуннаву къуллугъ бансса 70 азаруннийн бивсса жагьилтал бур жучIава.
Ларгсса шинах бурувгун, гьашину квота кIилий ххишала дурну дур. Жагьилтал къуллугъ буллан гьантIий бур мукьра аьрали округрайн (Кьиблалул, Дянивмур, Баргъбуккавал ва Баргълагавал) ва Ухссавнил флотрайн.

Республикалия тIайла бувкния тихунмай вайннал къуллугъ байбивхьушиврун ккаллину бур. Жагьилтал къуллугъ буллантIий бур аьралуннаву ца шинайсса. Гьашину аьралуннавун буцлацими дукIунияр ххишала шаву аьра­луннаву аьркин хъанахъисса пишакартал (фельдшертал, слесарьтал, крановщиктал ва м.ц.) буцлацаврицIун бавхIусса иш бур. Ва ххуллух аьралуннавун наниминнал цалчинсса кьюкьри тIайла дуккантIий дур апрель зурул 17-нний. Утти­сса призыврал цIушинна хъанай дур жагьилтураща, пропискалух къабурувгун, цивппа ялапар хъанахъи­сса кIанттурдай учетрай бацIан бюхъаву. Цамургу цIушинна: дянивсса дуккаврил заведенияртту къуртал бувну, вузирдавун бувхми ми къуртал банцIа битлай бур.

Аьралуннавун буцлацими ххал буллантIиссар къачагътурал кьюкьравуминнащал дахIаву дусса, наркотикру ишла буллалисса бурив, бакъарив.
Журналистурал суаллахьхьун жаваб дуллай, Дайтбаг Муста­ппаевлул бувсунни хIакьинусса кьини 4 азаруннийн бивсса инсантал бушиву аьрали къуллугърая махъаллил хъана­хъисса. Бувсунни махъсса дачIи шинал дянив командиртурая Дагъусттанная­сса 25 аьраличунал хIакъираву барчаллагьрал чагъарду, 12-ннал хIакъираву тIурча, аьрзри бувкIшиву. Аьрзри бувкIсса аьралитал цуми шагьрурдаясса, районнаясса буссарив военкомнал кIицI къабунни.