АцIнияхъайсса шинну ларгун дур та боевиктуращалсса дяъвилий арс ивкIуну Мусаевхъал кулпатрал.
Амма хIакьинусса кьинигу уттубивхьусса шаний, канакисса дукралувух, хIачIлачIисса щинавух цила арснал симан хъамаритан хъанай дакъар Мусаев Ибрагьиннул ниттища — Иринаща.
Инсаннаща дан къабюхъайсса даву дакъар. Амма, цуксса гьунар бусса ухьурчагу, инсаннаща къашай ва лерххун нанисса чIун дацIан дан. Оьрму наниссакссагу жува бикIару лавгмунил, ккавкмунил хIисав-сан дуллай. Циваннивгу къакIулли, инсаннан цала оьрмулуву хьусса ххуймур ччяни хъамабитай. Амма оьмур оьрмулухун дакIний личIай. Бакъахьунссар дунияллий дарувгу арснацIа хьусса ниттил дакIнийсса щаву хъин дан шайсса.
— Ттун, хIакьинусса кьини кунна, дакIний дур ттуна цалчинсса арс увсса кьини, ганал цалчин ттуйнма «дадай» увкусса лахIза, ганал цалчин лавсъсса ша… Щил учинссия оьрмулул аргъиравусса, ца ххяликсса, ттул арс Гелаев тIисса бандитрив, цурив къакIулсса инсан сававну оьрмулуцIа хьунссар куну… — ниттил яру мукьал бувцIуна. — ЧIивиния шинайва тIайлашин ххирасса ттул арс га кьинигу, хъунаманал цахьва, инава малагарача, вила зузалт гьан бува куну бунува, нарахха вайннал хьхьичI ачин аьркинма куну, цалчин цува лавгун ия зунттайх ливхъун нанисса Гелаевлул хъирив агьан. Бюхттулсса ца муруллуя гамур муруллуйн тIанкI кусса лахIзалий, зумания ливчуну, ттул арс куртIсса кьакьалувун агьну ивкIун ия. Шанма гьантта хьуну бия ганах луглай, къаляхълай.
ЦIунтIайннал райондалий Гелаевлуйн щаву дирну дусса дур, МахIачкъалаллал 6-мур милицанал отделданул зузалтрахьхьун иривну усса ур тIисса информацияртту дия. Му чIумал телефондалувух оьвкуна МахIаммадлуйн. Мадара хIал хьуна ганал, телефондалул трубкагу бувгьуну, жухь ссихI къадуклай. Ласнал яруннайн яру тIайла бацIайхту, ттул хъазам щаран бивкIуна…»
Жухь тачIав бугу-къабусайссия цува чун наниссарив, так командировкалий най ура учирча бакъа. Му ппурттуву Ибрагьин цувагу, дахьва цIуну кулпатгу бувну, цамур квартиралий яхъанай уссия. Амма, цува аьрххилий нанитари, жухь чара бакъа барчаллагь учингу учIайва. Га ия зий яла нигьачIаву дусса милицанал отделениялий – МахIаммад Оьмаровлул каялувшинна дуллалисса. Яла захIматмур иширттавухгу гай бикIайва цалчин.
Ца кьинигу, жухь Щурагьун командировкалий най ура куну, лавгуна. Амма гьунттиймур кьини телевизорданувух ккаккан буллан бивкIуна гайннал отделениялул оьрчIру, автоматругу хъарайну, Къарамащиял шяраву биту-ххиту буллалисса кIанай.
Цала оьрмулуву гикку ккавккун бия ттул арснан цалчинсса бивкIугу. «Я, ттул арс, кьарити му даву, му нигьал ва хьуллил дянивсса даву дур, жун, ина командировкалий лавгукун, шаний шану къабияй, чIярурхха цайми-цаймигу давуртту», — тIун бикIайссияв. «Ттун кIулли ттулла даву ххуйну, на профессионалла. Зу ттул буруккин мабари, цуппа ца душманнал ккуллалул на къаласайссара»,- куну, жу кумургу хъярчирахун бишайва. Ттун ттула арс чIявуну лащайва бугьан къашайсса мурчаха.
Гьай-гьай, га бия ганал дакIнил мурад. Школалий дуклакисса чIумала икIайссия жула кучалий, хIаятравура низам дихьлай. ДакIний бур, цал чIаххуврал къатта бавцуну ливхъун нанисса кIия-кIия жагьилнал хъирив агьну, арснал гай бувгьуну бивкIсса куц. Гания шинай, гьарца къавкъиншиву хьуни, лагма-ялттунал Ибрагьиннуйн дикIайссия леххаву. Ца чIумал Ибрагьин дарсирайн къалаглай щаллусса барз хьуссия, цайн «тталай» кунни тIий. Банмур бухлавгун, жу га яла профтехучилищалувун авкьуссия. Гагу ххювардай къуртал бувну, хъунма хIал къавхьуна цала пишалий зий. Ялагу, ттун милицанай зун ччай бур тIий, милицанал школалийн увххуна. Гиккугу цал физрукну икIайссия, яла участковайну зий, хъунма хIал къавхьуну, 6-мур отделданул хъунаману ивтуна.
Гьай-гьай, я на, я ттул лас МахIаммад рязину бакъассияв жула арс га отделданий зузаврия. Му бакъассагу, га чIун дия хъинну нигьачIаву дусса, захIматсса. Жуща бан шайсса цичIав бакъая, так Аллагьнахь цIими чIа тIурчан бакъа.
Га шинал тачIав дакъачIин оь диркIсса кIигу дия, цуппагу яла бявкъумур барз – февраль. «На гьунттий Хасавюртлив командировкалий най ура», — куну, лавгуна. Най бия гьантри. Гьарца кьини жу телефондалувухгу оьвчайссия. Гьай-гьай, гай бала-хатIасса, дуниял къачагътурал дурцIусса шиннардий, Дагъусттаннай хъанахъимунил буруккинтту буллали къаувсса нажагьссагу акъахьунссия. Мунияту жугу тачIав телевизор къалещайссия. Га кьинигу буру, жуннийва хъамалгу буну, телевизорданух буруглай. ЦIунтIайннал райондалий Гелаевлуйн щаву дирну дусса дур, МахIачкъалаллал 6-мур милицанал отделданул зузалтрахьхьун иривну усса ур тIисса информацияртту дия. Му чIумал телефондалувух оьвкуна МахIаммадлуйн. Мадара хIал хьуна ганал, телефондалул трубкагу бувгьуну, жухь ссихI къадуклай. Ласнал яруннайн яру тIайла бацIайхту, ттул хъазам щаран бивкIуна…».
ХIакьину Мусаевхъал кулпат къакIулсса нажагьсса акъахьунссар Дагъусттаннай.
ТтурчIиял шяравасса Увайс МахIаммадовлул – Ибрагьим-Халиллул ттатталгу, цала оьрму хас бувну бур низамрал даврин. ХхюцIалку шиннардий ва зий ивкIун ур ЦIуссалакрал райондалул милицанал хъунаману, ряхцIалку шиннардий – Хасаврал милицанал хъунаману. Увайс МахIаммадовлул бувсса гьунардал, захIматрал барашиннагу дуллай бур Хасавюртливсса кучалул – Увайс МахIаммадовлул цIанийсса. Ванала арс АхIмад Увайсовгу хIакьинусса кьинигу ур жула шагьрулул низам дуручлай. Милицанал даврихсса гъира ттаттая бивхьунссия Ибрагьиннуйнгу.
БивкIу бакъасса инсан акъашиву цинявннан кIулли. Цува дунияллий уссаксса инсаннал цалла чIин кьаритай аьрщарай. ЧIава жагьил хьуну ур буттал лажин къаккарксса, буттан цIа дирзсса, кIилчинсса Ибрагьин. Мусаевхъал виричушиврул цIагу личIантIиссар ирсирай цимирагу никирай.
МВД-лул хьхьичI дацIан дурсса мармарчарил улттуйгу, чанна цIуку кунна, пар-пар тIий дур капитан Ибрагьиннул цIагу. КъабухлагантIиссар тачIаввагу му цIанил уздансса чани.
Сиянат ХIажиева
