[dropcap]М[/dropcap]арт зурул 24-нний МахIачкъалалив дайдирхьунни «Внимание – дети!» тIисса профилактикалул мероприятиялул цалчинсса ятIап.

Акциялул мурад бур ххуллурдай инсантуран апатIру къахъанансса чаранну лякъаву ва ххуллул низамрал тIалавшиннарду дуруччаврил ялув ххишалану бацIаву.

ДПС-рал зузалтрал ххишаласса къулагъас дуллантIий бур оьрчIру бувцуну заназисса транспортрах ва ялув бацIантIиссар вай машинарттал щупиртурал ххуллул низам дуруччаврил.

Нанисса шинал 2 зурул дянив МахIачкъалалив сияхIрайн ларсун дур 9 ДТП. Вай иширттаву цIунцIияртту хьуну дур 18 шинавун бияннинсса 9 оьрчIан.

Аьмну оьрчIру хIаласса ДТП-тту чан хьуну дур. ОГИБДД-лул зузалт цал ттигу оьвчаву дуллай бур щупиртурайн, ххуллурдайх, хаснува дуккаврил идарарттал чIарах, личIлулну бачияра тIий.
«Внимание – дети!» акция бикIантIиссар 8-мур апрельданийн бияннин.

Радик ХIапизов,
полициялул хъунама лейтенант