Ларгсса нюжмардий, цIусса хаварттал сияхI ккалай буна, итталун багьуна, МахIачкъалаллал 13-мур школа-гимназиялий ЕГЭ дуллалисса оьрчIал нитти-буттащагу, гъира бухьурча,
«Жу марцIну ЕГЭ дулаврихлуру» тIисса акциялий гьуртту хьун бюхъантIиссар тIисса хавар. Нагу га цIана, ва гьашину ттуйнма багьаймур масъала бурча куну, тавакъю бувссия ттуламур цIа-бакIгу чичин.
Залму АьбдурахIманова
Ттущал ихтилат буллалисса КIулшивуртту дулаврил министерствалул пишакарнал кIицI бувна ЕГЭ-лийн бучIан аьркиншиву 45 минутIрал хьхьичI так паспортращал ва лухIисса щекьирай чичайсса ручкалущал.
Ва акция билаятрал регионнай буллай шамилчинсса шинни. Ванил мурадгу, сакиншинначитурал бусаврийну, ЕГЭ дулайни ишла дувайсса шартIирдащал нину-ппухълу кIул буллалисса бусса бия. ХьхьичIми шиннардий выпускниктурал нитти-буттал оьрус мазрал ва математикалул ЕГЭ дуллай бивкIхьурча, сакиншинначитурал пикри бувну бия гьашину так оьрус мазралсса кьамул дуллан.
Ххуллункьини шагьрулул 13-мур школалул жанахIраву, буниялагу, цимурца хIадур дурну дия, мяжаннугусса ЕГЭ дулайни кунна. Цалчинмур зивулийсса жанахIравухгу, гьар кьини кунма, оьрчIру лечлай бакъаяча, бувагу ца-кIива зурувату экзаменну дуллансса цала оьрчIал буруккинттарайсса нину-ппухълу бия. ХIадурну бия гьурттучитурал цIарду лахъну баян буллансса микрофонну, колонкартту, металлодетекторду ва хIат-хIисав дакъасса ялув бацIулт ва полициялул зузалт. Сакиншинначитуравасса цаннал тавакъю бувна, паспортру ва ручкарду личIаннин, телефонну ва канихьсса буза ккаккан бувсса кабинетраву кьабитан. ЕГЭ дулун бувкIун бия Избербашрая, Дарбантлия, УнцIукIуллая ва цайми архсса кIанттурдаясса нину-ппу. ХIасил 150-ксса инсан ия.
Бия ЕГЭ дуллалиминнавух журналисталгу, блогертал ва общественникталгу.
Ахиргу, дуркIуна чIун жу экзаменну дуллалисса кабинетирттавун буххансса. Фамилияртту лахъну баян буллалисса, металлодетекторданувух буккан буллалисса ва ялув бацIултрал жул жипаву ци дурив ххал дуллалисса ца авара байбивхьуна. ЕГЭ дулаврил низамрал тIалавшиннарду кIулнугу, оьрчIай аьтIисса циняв ниттихъал кунма, жулми дакIурдивугу: «Жул оьрчIру ваксса нигьачIакIул бансса ва ци авазар», — тIими пикрирду чан хъанай бакъая. Мяй-мяйя инсан цачIуну щябивтру кабинетирттаву, гьар кIанай камерартту ва гиву хъанахъисса ихтилатирттах вичIилийсса оборудование дирхьуну дия. Жух ялугьий бусса бия Москавливсса ялув бацIаврил штабрал пишакарталгу. Вай цимурца давуртту жул цIанийсса дакъахьунссияча, буниялагу, ЕГЭ дулайнисса цала техникалул хIал кIул бансса духьунссия.
Экзамендалул давурттал хьхьичIмур бутIуйсса 8 заданиялун жун дуллуна дачIи ссят. Вай чичиннив цичIав захIматшиву дакъая. Жу чивчумунил ялувгу хъуннасса бакIцIуцIаву дуллалисса цучIав акъая. ХIасил, мурад бия жу ЕГЭ-лул аьмсса тагьарданущал кIул баву.
ДачIи ссятрава давурттугу дуллуну, жухь тавакъю бувна школалул залдануву сакиншинначитурахьхьун суаллу булун ччисса ухьурча, батIаврий гьуртту хьун. Булунсса суаллугу, ЕГЭ-лул чIумал ишла бувну ччисса маслихIатру ва тавакъюрдугу жул чулуха сакиншинначитурахьхьун чIявуя.
Гайннал жухь бувмур маслихIатгу ца бия – экзаменнацIун дархIусса гьанавиххишивугу кьариртун, оьрчIал дакIру паракьат дуллансса ва оьрмулуву кьини ца ЕГЭ-лий дарцIуну дакъашиврия тикрал буллан.
