Вай гьантрай «Дагестан» РИА-лул редакциялий «Жагьилсса пишакартурал» (WorldSkills Russia) региондалул мукьилчинмур чемпионатрал даврил хIасиллу дунни.

Имара Саидова
«Успех» тIисса Республикалул жагьилтал давурттал щаллу байсса центрданул директор Шамил МахIаммадовлул бувсунни регионнай хьусса чемпионатирттай ххув хьусса пишакартал гьуртту хьунтIишиву Къазаннай хьунтIисса Аьрасатнал Федерациялул чемпионатрай.
Гьашинусса чемпионатрай гьарза хьуну бур 15 журалул пишар­дал компетенцияртту.
«Ларгсса шинал 28 журалул пишардал усттаршиврул бяст-ччаллу най бивкIхьурчан, гьашину миннул сияхI лархъунни 43-ннийн. Мукунма гьашинусса бяст-ччаллаву гьарза хьунни гьуртту хъанахъими ва экспертътал. Му бакъассагу, гьашинусса чемпионатрай гьуртту хьуссар оьрмулул 50 шинава ливчусса пишакарталгу. Аьмну 200-нния ливчусса пишакартал гьуртту хьуссар личIи-личIисса пишардал усттаршиву ккаккан давриву. Буссия номинацияртту ца усттарнал магьиршиву кка­ккан дуллалиссагу, командартту цачIун хьуну усттаршиву кка­ккан дуллалиссагу», — увкунни Шамил МахIаммадовлул.
Пресс-конференциялий кIицI лавгунни, сакиншиндарал ма­съалартту ДР-лул ХIукуматрал председатель Артем Здуновлущал ххал бивгьуну, хасъсса маслихIатру ккавкшиву. Бувсунни чемпионатрал давривух чялишсса гьурттушинна дуршиву ДР-лул Культуралул, Транспорт­рал министерствардал.
КIицI ларгунни мукунна чемпионатрал давриву хьунадакьлакьисса захIматшивурттугу. « Хьхьарасса бур жучIава пишардал усттаршиву лахьхьин дуллансса базарду ва хасъсса тренертал», — увкунни Шамил МахIаммадовлул.
Аьдатравун багьсса куццуй, Аьрасатнал чемпионатрайгу захIматрал пишардал усттаршиву ккаккан дурну, ххув хьусса оьрчIан дулунтIиссар арцуйнусса бахшишру ва ми кьамул бантIиссар Аьрасатнал региондалийсса хьхьичIунсса предприятиярттай зун.