Владиккавкказуллал шагьрулий 11-мур школалий урчIилчинсса классраву дуклай ур жула лакку оьрчI — Мурадлул арс Арслан ХIажиев.
Ванал цIа, спортсмен хIисаврай, машгьурну дур, АьсатIиннал республикалий дакъассагу, мунил кьатIувгу. Джиу-джитсу тIисса спортрал дунияллий ванал ласлай ур цаннияр ца хьхьичIунсса ххувшавуртту.
2018 шинал Аьрасатнал чемпионатрай кIилчинмур кIантту бувгьуну, яла Санкт-Петербурглив гьарца шинах шайсса Д. Кожемякиннул цIанийсса чIаважагьилтурал турнирданий цаннил хъирив ца ххюйла ххув хьуну мукьах ва гьуртту хьуну ур Афиннайсса дунияллул первенствалийгу, тикку ванал ларсун дур чарвитул медаль. Ахиргу Москавлив хьусса «Открытая Европа» тIисса бяст-ччалливу Арсланнул бувгьуну бур цалчинсса кIантту. Ванал каялувчину ур Артур Дзитоев тIисса тренер.
Спортраву акъассагу, Арслан мукуна хьхьичIунну ур дуккавривугу, байбихьулул классирттая шинай ва ур дарсирдал отличникну.
Арсланнул ппу Мурад (Гъумучатусса) ур АьсатIиннаву цIа дурксса хIакин-невролог, нину Саида (Хьуриятусса) бур хIакин-пульмонолог.
ЧIа тIий буру Арсланнун вания тихуннайгу цаннияр ца ххаллилсса ххувшавуртту – спортравугу, дуккавривугу!
Жула Дагъусттаннай цIа дурксса хIакин, жуна цинявннанагу кIулсса, хIурмат ххисса Ибрагьим Кьалияевлулгу ссурахъил арс хъанай ур Мурад. Ибрагьимлухьгу, махъсса циняв маччаминнахьгу барча дуллай буру Арсланнул ххувшавуртту ва тIайлабацIуртту!
Жул корр.
