Тавхана — му цири куну цIувххукун, чIявуссаннал учай му хIурмат лавайсса хъамаличунансса къаттар куну. Му тIагу-тIайлассар. Ваччиял шяраву, ттун кIулну, лапва ляличIисса тавхантту буссия КъутIахъал ва Будайчихъал.
Жула зунттавусса щархъал чIяруми къатри сакин хьусса диркIун дур шанма къатлуя – ца пачкъатта, ца хъункъатта, цагу тавхана. Жул жуллами къатрал цанниву, яни пачкъатлуву, бия кIара. Му кIарттуя тихуннай дикIайва лахъру, ххялчIая сакин дурсса, мунил мурцIух лавай бия чарттал бургъугу, лахърулул вивх нанисса пуркIу буккайсса. Лахъругу, туну, пуркIурал кIюрххилнин гъили дурну дикIайва.
Жул тавхана вайми къатраяр лахъсса бия, утта-лахъисса 2 чIавахьулу бия, гайннул дянив дия кIач, неххал бювчIу чарттая дурсса, кIачлил тиха-шиха дия дацIан дурну кIюласса ххялчIи, 1-1,5 м. лахъшиврий, 60-70 см. лахъишиврий хьхьичIунмай личин бувну бия. КIачлил ялув дирхьусса ххялчIул тиха-шиха бия картру бувккун, чулухми ххялчIив дугьайсса. Ялувсса ххялчIуй хъуннасса ккутI дурккун, кIикку бия хъуни бакъасса чарттая бургъу бувну, магъулун бияннин, пуркIу лагайсса. Бургъулий дия ххярацлу, цивунгу бучIайсса ххялчIул касак, цIу лерщун махъ гъилишиву къатлува къадуккаван.
ЧIанкъатлувун бивчуну бикIайва ххютIри, варсив. Дукра дукан щябикIайсса 7-8 мюрщисса кIаралугу бикIайва. Шану-кIаралу, виргъантру дишайсса тахтардал лахъругу дия, мурцIув ца хъунмасса буттукьагу бикIайва.
Вай гьарца зат ттун дакIний бур, хъамаличу итан къатта хIадур буллалийни, навагу, баван кумаг буллай, ттущава шаймур буллай икIайсса ивкIун тIий.
На ва чIирисса макьала чичав, ялун нанисса никирттангу кIулну бикIувча цуксса хъунмасса бивкIссарив хъамаличунал хIурмат жула нитти-буттахъал тIисса мурадрай.
Нагу «Илчилул» муданасса букку КъутIаев Рамазан-ХIажи (82 шинавусса),
ш. МахIачкъала
