Мартрал 10-нний, Каспийскалий, Аьрасатнал футболданул чемпионатрал лагрулий данди дарцIунни «Анжи» ва «Локомотив» командартту.

Р. Къардашов
«Локомотив» командалул тIуркIулул бакIрайра кIунттил дургьунни ттуплий буккаврил низам. ТIуркIулул 22-мур минутIрай «Анжилул» къапулул чулинмай кьувтIуну нанисса муттаэтурал гьужумчи Фан-Фаннул къапучинал чIарах бивщуну гьан бувсса ттуп бавкьунни жула къапулувух – гол.
ТIуркIулул ахирданийннин «Анжилуща» къавхьунни личин муттаэтурал ялув бувхIусса тIуркIулул ххуттава.

Ххишалагума, 80-мур минутIрай «Локомотиврал» гьужумчи Смоловлул «Анжилул» къапулул хьхьичI, конькайсса хоккеист куна, защитниктурал дянив ккюрнутIайрттугу дуллай, бавкьунни гол «Анжилул» къапулувух.

Жула командалухьхьунгу биривуна «Локомотиврал» къапулувух гол бакьинсса мутта, амма Кацаевлул бивщусса ттуп къапулийн тIайла къабавцIунни. ТIуркIулий кIилийну ххишалану ттуплил заллушиву дурсса «Локомотив» командалул кIилийну гьарзану голлугу бавкьунни. Ахиргу тIуркIулул хIисав 0:2 хьунни.

ТIуркIулул хъирив хьусса пресс-конференциялий «Анжилул» хъунама тренер МахIаммад Адиев буслай ия, тIуркIулул дайдихьулийва итабавкьусса голданул зия дуршиву бакIрайра щаллу дурсса «Анжилул» тIуркIу бачин бансса низам.
«Анжи» командалул хъиривмур тIуркIу хьунтIиссар мартрал 15-нний, Каспийскалий, «Крылья Советов» командалущал.
Цалсса «Анжи» бур Аьрасатнал футболданул чемпионатрал сияхIрал 14-мур ххуттай.