ХIабибуллагьлул арс Абакаров Абакар
Февральданул 4-нний оьрмулул 82 шинаву, хъунмасса хIаллай къашавайгу ивкIун, захIматсса азардануща ххассал къавхьуну,
жуятува личIи хьунни гьарца чулуха инсаншиврул бутIа буллусса ххаллилсса зунттал чув, Гьущатусса ХIабибуллагьлул арс Абакаров Абакар.
Абакар увссар 1936 шинал Гьущиннал шяраву. КIиккува 7 класс, Гъумук 10 классгу марцIсса ххювардай къуртал бувну, увхссар 1957 шинал Шяраваллил хозяйствалул институтравун, бувккуссар ветеринариялул факультет. Зий ивкIссар Ккуллал райондалий личIи-личIисса участокирттай ризкьилул хIакинну. 1966 шиная 1973 шинайнин зий ивкIссар КIубурдал ва Гьущиннал колхозрал председательну. Зий уссия Гъумуксса ветстанциялий хъунаманал хъиривману. Мичча Абакар тIалав увну, зий уссия Сулакьрай Лакрал ветучастокрал хъунаману.
Чув зий унугу, Абакардул ккаккан бувссар цува хъинну за кIулсса, лагма-ялттунащал, архIал зузиминнащал хIал бавкьусса уздансса адамина ушиву. Жяматрал давривухгу чялишсса гьурттушинна дувайссия ванал. Абакар бавкьусса хъунмасса кулпатрал ххаллилсса заллугу ия.
ХIайп, лавгунни жуятува бакIралгу ххуйсса, гьарзатралгу усттаршиву дусса, хъатIал-хъиншивурттал муданасса тямада, уссурссуннал чул бищай кIану – Гьущи-КIубурдал маслихIатчи Абакар. Ина акъа мискин хьуссар утти жун ва дуниял.
Хъуннасса кьурчIишиву кIидачIлай, жижара буллай буру кулпатрахь, арсваврахь, душнихь, ссурваврахь ва махъсса уссурссуннахь. Абакардун къабуллусса оьрмулул гьантри оьрчIан ва оьрчIал оьрчIан булуннав. Цал гьав нурданул дуцIиннав, алжаннул ххари аннав.
Гьущиннал ва КIубурдал
жямат, дустал, гьалмахтал
Ларгсса нюжмардий, февральданул 21-сса кьини, инстаграмраву, ванияр 5 шинал хьхьичI апатI хьуну аьпалул хьусса, цала дус Гуйдалаев ХIамзатлуясса назму рирщунни МахIачкъала шагьрулул Кировский райондалул администрациялул бакIчи СалихI Сагидовлул.
— Ххюра шин ларгунни мудангу чачIу-чIарав, чул бищай ттарцIну ивкIсса ттул уссу кунасса дус ХIамзат аьпалул хьуну. Ниттил мазурдил кьинилуцIунгу бавхIуну, ччан бивкIунни ттула аьзизсса дуснан хас бувсса ниттил мазрайсса цаппарасса ххару чичин. ХIамзат икIайссия дусшиву дангу, дуруччингу кIулсса жагьил, цала кулпатрал ххаллилсса заллу, оьрчIан ххаллилсса ппу. Мунал авкьатсса симан, цIу бусса къуццу мудангу жущал буссар.
Дустал, зунма ххираминнал кьадру бувара, ми зула чIарав буссаксса, — тIий васижатрай ур СалихI Сагидов.
Замгьарданул кьини
загьрулул кьуру
Лялиян буван ччай,
хъанай акъара.
Зий, занай унугу ва дунияллийх,
ХIасратрай ура, дус,
ина къаккаклай.
Ина ияв лачин,
дустурал бакIчи,
Битавсса чурххаву
хъинсса дакI дусса,
Ина ияв, ХIамзат,
хIакьсса зунттал чув,
Чул бищун бюхъайсса,
чувшиву ххисса.
КIа Хъунасса Заннайн
щукрулий ура
Ина кунасса дус
нясив увну тIий.
Ттула арсваврангу
Заннахь чIа чинна
Так виха лавхьхьусса
оьрмулул дустал.
СалихI Сагидов
