[dropcap]М[/dropcap]ахъсса чIумал жунма чIявуну баллали хьунни тикку-шикку газ пIякь увкуну, халкьуннан хъунисса зараллу хьуну бур тIисса хаварду.
Укунсса журалул бала-апатIру чан бансса чараннах къулагъас дуллай, чялишну зий бур «Щюллисса дуниял» тIисса Дагъусттаннал регионал жяматийсса сакиншиндарал вакилталгу.
Мисалдаран, халкьуннал къатраву газ пIякь увкуну, хьусса зараллал хIасиллу дуллай, миннуя СМИ-лул кумаграйну агьалинахь личIлулну бикIан аьркиншиврия буслайнма бур. Кказит-журналлай ва радио-телевидениялий бусласаву бакъасса, вайннал активистътурал апатIирттая личIлулну бикIан аьркиншиврия чивчусса чIапIив лачIайсса дур къатрал подъездирттаву, кучардай, хIаятирттавугу.
Цуксса агьалинахь газрая личIлулну бикIан аьркиншиврия буслай бунугу, шиная шинайн укунми апатIру чан хъанай бакъар. Ларгсса шинал Дагъусттаннай газ пIякь увкусса 36 иш хьуну бур. Ва шин дайдирхьуния шинмайгу, газрал бугъ бувну, халкь ливтIусса, азарханардайн биян бувсса ишру чансса бакъар.
Газрал пишакартурал бусаврийну, чIявуми апатIру шайсса бур хъунмурчIин халкьуннал цала баччибакъулшиву сававну: лахъисса манзиллайх газ нанисса шлангру дишаву, газрал хъуни бургъурдал чIарав къатри даву, газрал оборудованиялучIа цIарацIун дархIусса давуртту дуллалаву.
«Щюллисса дуниял» тIисса регионал сакиншиндарал вакилтурал щурущи дан най бур «Безопасная среда» тIисса проект. Вай оьвтIийгу бур республикалул школарттал дуклаки оьрчIайн, ссузирдал, вузирдал студентътурайн, жяматийсса ишккаккултрайн, шагьрурдал ва районнал УЖКХ-лул зузалтрайн, муниципалитетирттал каялувчитурайн хьунтIисса мюхчаншиврул давурттавух гьуртту хьун.
ХIадур бувссар
З. АьбдурахIмановал
