ХьхьичIавасса грекнал зайтундалул (оливкалул) аьгъушиврийн хьюму муси учайсса бивкIун бур, Египетнаву тIурча, му ккалли дувайсса диркIссар тIар хъуннасса бахшишран.

ХIакьсса зайтундалул аьгъушиврул дикIайссар чаннану-щюллисса ранг ва тIааьнсса ахъулссаннул ва урттурал кьанкь.

* * *
Зайтундалул аьгъушивруву чIявуссар витамин А, витамин D, жагьилшиврул витаминдалун ккаллисса витамин Е ва м.ц..

* * *
Зайтундалул аьгъушиву хъанахъиссар инсаннан ца яла мюнпатмур сурсатну. Ва дур сайки цинявннан бучIисса, дукралувух ишла даврин сайки къадагъа дакъасса сурсат.

Зайтундалул  аьгъушиву – косметологиялувугу
Ва аьгъушиврул косметологиялуву бугьлагьимур кIанугу хъунмар, лажиндарал бурчуха­сса, кIизухасса къуллугъраву ванил дуллалимунил дазу дакъар.

Лажиндарал бурчу марцI буваншиврул
Зайтундалул аьгъушиврул 5 хъун къуса, 4 хъун къуса алоэлул сокрал, ца-ца чяйлул къуса лимондалул, суврарал, чяйлул мурхьирал (чайного дерева), миндальданул аьгъушиврул (аптекирттай дахлай дур ччимур аьгъушиву) хIала дурну, цIансса пюрундалул шушлувун дуртIуну, дишин аьркинссар холодильникраву. Аьркинний, паммалул касакрайн дуртIуну, лажиндарал бурчу марцI буван аьркинссар.

Чурххансса ва  лажиндарансса скраб
Кофелул лув дагьмур (гуща) ва нехълул пархханну (овсяные хлопья) зайтундалул аьгъушиврущал хIала бувну дурсса скрабрал хъинну ххуйну марцI бувантIиссар лажиндарал ва чурххал бурчу.

Яруннил лагмасса жигдатIрурдая
Дахьра гъили дурсса зайтундалул аьгъушиву яруннил лагма дурккун, кIисри дахьва тIуркIутIи бувну массаж буван аьркинссар. Гьарца хьхьуну дулларчан хъинссар ва процедура.

Лажиндарал бурчу бючIан баншиврул

Косметологтурал зумату чIя­вуну баяйсса «лифтинг-эффект» дусса, яни лажиндарайсса жигдатIрурдащалсса талатавриву ххуйсса кумаг шайсса маскану хъанахъиссар ва маска: хIала дуван ца-ца чяйлул къуса зайтундалул аьгъу­шиврул, бартлил, къурул ва лимондалул сокрал, ца хъунна къуса лахърулул (дрожжилул). Лажиндаравух дурккун, 10-15 минутIравун шюшара дюхлулсса щинай.

Каруннил бурчу кьавкьний
Муданна щинавусса, тIахIни-кIичIу шюшлайннасса ва ичIа­ллил цайми давуртту дуллалисса кару кIукIлу дуван кумаг хьунтIиссар, ми зайтундалул аьгъу­шиврул кIунтIру бувтIусса гъилисса щинаву дитарча. Каруннил бурчу хъиннува кIукIлу хьунтIиссар косметологиялуву ишла дувайсса синааьрщарал (глина) ва зайтундалул аьгъушиврул компрессрая махъгу.

КIизуха къуллугърай
ЧIачаран (перхоть) бакъа буван кумаг хьунтIиссар бакI шюшин 30 минутIрал хьхьичI, цара-цасса лагрулийну ларсун, касторданул ва зайтундалул аьгъушиву хIала дурну, бакIрайх дуккарча.

КIизул цIай, цIуллу-цIакьсса диц-куц дучIаншиврул: ккунук­рал ца хъахъу, ца хъунна къуса зайтундалул аьгъушиврул, ца лимондалул сокрал, пиволул бачIи стакан хIала бувну, бакIрайх бу­ккан, 5-10 минутIравун зува шюшайсса куццуй кIиз шюшин.

КIибивзун нанисса ва кьатI хьуну нанисса кIиз бацIан буван, бакIрал чIарарду ххуйну ххя­ххан дуван, бакIрал бурчу ххуй буван яла бигьамур маска: гъили дурсса зайтундалул аьгъушиву, кIизул мархрая байбивхьуну, щалла лахъишиврийх дур­ккун, бакIрайн лаххан аьркинссар душравун лаххайсса кьяпа, ял­тту калихьу кай-кай дурну ягу лачак дархIуну гъилину битан, 30 минутIравун бакI шюшин.

ХIадур бувссар Бадрижамал Аьлиевал