«2018-2020 шиннардий Да­гъусттан Республикалий терроризмалул идеологиялийн къаршисса программалул» лагрулий А. Къапиевлул цIанийсса Лак­рал паччахIлугърал музыкалул ва драмалул театрданул бивхьунни Дагъусттаннал жагьил­сса драматург Марат Шахмановлул «Плач Валкирия» пьесалиясса «Исповедь» тIисса спектакль.

Спектакль ххал бувсса режиссертал, актертал чIурчIав дуллай бия тIайлабацIусса хьушиврий жагьилсса драматург­нал дебют.
Зулайхат Тахакьаева
Жагьилсса автор дагъусттаннал тамашачитуран кIул унни Аьрасатнал магьирлугърал лайкь хьусса ишккакку, режи­ссер Мавлет Тулпаровлул:

— Маратлул цала пьеса ттучIан гьан бувна. Му буккайх­ту на хъинну ххари хьура. Цанчирча хIакьинусса кьинилун тIалавсса, мяъна-мурад куртIсса, бунияласса тема аьч дуллалисса пьесарду, Дагъусттаннай чари, Аьрасатнавугума бакъар. ХIатта щала дунияллийва драматургиялул ккаши бур. Ягу нач-хIая дакъасса, цIу бакъасса пьесарду бур. Дурккусса, гьунар бу­сса ушивруцIун, Маратлул дакI драматургнал дур. Цайми пьесардугу бур ванал хIакьинусса кьинилуцIун бавхIусса. Ттул ванайн хъуннасса вихшалагу дур, на ванащал зун хIадурнугу ура. Актертуралгу на лап хIайран увунна. Цамур билаятрай, цамур миллатрал дянив лавгмур ттуршукулий хьусса ишру хIакьну ккаккан бан бювхъунни вайннаща.
Гулизар Султанова:

— Спектакльданул тIайлабацIу му бунияласса темалиясса, муниву драмалул сипатру аьч дурну душивруву, пикрирду илкинсса бушивруву бур. Спектакльданувусса ишру 1933 шинал Германнаву хъанай бивкIхьурчагу, ми хIакьинусса кьинилуцIун бавкьусса бур. Темалул агьамшиву хъуннасса дур, хIакьинугу жула билаятрай личIи-личIисса кIанттурдай фашистурал пикрирду няраву щурущисса жагьилтал хьунабакьлай буну тIий. Аькьлу-кIулши цалий дацIан дурасса, оь кIирисса жагьилтурахь ссая мюхчан хьун аьркинссарив, щил хъирив бачин аьркинссарив, дяъвилул цукунсса баларду ялун буцайссарив бувчIинсса дарсну хьуншиврул, ккаккан бувссар ва спектакль. На ххарину бура жагьилтураща ва спектакль, хъинну вив бувххун, лалавсун, лавайсса даражалий бишин бюхъаврия.
Ттун хъинну ххуй бивзунни актертурал тIуркIу. Лап кутIасса чIумул мутталий – ца зурул дянив, хIадургу бувну, лавайсса даражалий ккаккан бунни цамур миллатрал вив хъанахъисса ишру. Бюхъай му жунна гъансса тема дуну тIий хьуну бикIан мукунсса тIайлабацIу. Цанчирча сайки кьуниясса шиннардил дянив жула республикалий ппив хьусса экстремизмалул идеологиялул, 30-ку шиннардий Германнавусса фашизмалул пикрирдал дянив тапаватшиву цукунчIавсса дакъар. КIирагу идеология хIусутсса дур, къалп­сса лозунгирттайну жагьилтал хъяврин буллалисса дур, жагьилтурал дакIурдивун сси бутлати­сса дур.

[pullquote]Марат Шахманов ур Гъу­ниннал райондалий­сса ЧIухърал шяраватусса. Къуртал бувну бур Дагъусттаннал паччахIлугърал университетрал филологиялул факультет, яла юридический факультет. ЦIанасса чIумал ялапар хъанай ур Москавлив. Зий ур Аьрасатнал боксрал федерациялий шах-бокс тIуркIулул (шахматру ва бокс хIаласса спортрал тIуркIу) тренерну. Ва хъанай ур Аьрасатнал Чичултрал союзрал член. Литературалухсса гъира чIивинияцIава бувтун бур филологну зузи­сса ниттил. [/pullquote]

Ламсанал мазгу, тарихгу, магьирлугъгу лахьлай на тийх дур­ссар шанна шин ва дачIи. Сайки мукссара чIун дурссар испаннал маз, тарих ва магьирлугъ лахьлайгу.
Спектакльданух хъуннасса къулагъас дур хIукуматрал чулуха. ТIалав буллай бур му лавайми классирттал дуклаки оьрчIан ва студентътуран ккаккан буллан.
Премьералия махъ спектакль ккаккан бунни МахIачкъала шагьрулул 9-мур школалул дук­лаки оьрчIан, Дагъусттаннал паччахIлугърал политехнический колледжрал студентътуран ва ДГУ-рал химиялул факультетрал подкурсирдай дуклакисса кьатIаллил билаятирттаясса студентътуран. Факультетрал деканнал хъиривчу Людмила Бурковал бусласимунийн бувну, хIакьину химиялул факультетрай дуклай бу­сса бур шанттуршуннийн бив­сса кьатIаллил билаятирттая­сса студентътал. Миннава подкурсирдай бур ххюцIалуннийн бивсса. Спектакльданийн бувцуну бия хIакьинугу дяъвилул цIу лагь хьун бувасса Сириянавасса, Иракьнавасса, миннал чIаххуврайсса Египетнавасса студентътал.
— Оьрус маз къакIулну бухьурчагу, кьатIаллил билаятир­ттаясса студентътуран бувчIунни спектакльданул гьанусса мурад. Спектакль байбишин хьхьичI жу миннахь бусарду спектакльданул мурад, ишру та, чув, ци сававрай хъанай бивкIссарив. Бусарду фашизм цирив, Гитлер цурив. Студентътуран цанма бувчIунни тани Германнавусса фашизм му хIакьинусса ИГИЛ душиву. Актертал дакIнихтуну роллу дургьуну бия. Хъинну ххуй бивзунни ниттил роль дургьусса Луиза Шагьдилова. Студентътуран ххуй бивзун бия жагьилсса актрисахъал роль дургьусса куц. Жугу, жул студентъталгу рязину ливчIунни. ДакIнихтуну барчаллагьрай буру Лакрал театрданул каялувчитурайн ва актертурайн ххаллилсса спектакльданухлу.

* Судрал хIукмулийн бувну Аьра­сатнаву ваний къадагъа дирхьуну дуссар.