ШаэршивруцIун ца цамургу гьунар

ШаэршивруцIун ца цамургу гьунар

Сугъури Увайсов ва Марита МухIадова

Р. ХIамзатовлул цIанийсса Национал библиотекалий хьунни Сугъури Увайсовлул дирхьусса суратирттал «Вдохновение» тIисса цIанилусса выставка.

Му хьунни, Республикалул Халкьуннал творчествалул къатлул сакин дурну, Республикалул «Самородки» тIисса цIанилусса проектрал лагрулий.


Бадрижамал Аьлиева
Уттинин шаэр, чичу хIисаврай кIулну ивкIсса Сугъури Увайсовлул ца яргсса цамургу гьунарданул хIасилну хьунни ва кьини­сса ккаккия.
Выставка тIитIлатIисса ихтилат бунни ДР-лул культуралул министр­нал хъиривчу, Республикалул Халкьуннал творчествалул къатлул директорнал хъиривчу Марита МухIадовал. Цилва ихтилатраву ванил кIицI лавгунни Су­гъури Увайсовлул гьунарданул ца цамургу яргсса чул хIакьину ялун ливчушиву.

Сугъури Увайсов ва «Дараччи» клуб

Ккаккиялун дирхьуну дия художникнал портретрал графикалий, анжагъ ца лухIисса кьалан ишла бувну, щаллу дурсса мукьцIалунния лирчусса суратру. Миннуву бувчIлай бур республикалул, лакрал интеллигенциялуву чIявучин кIулсса инсантал: жяматийсса ва политикалул ишкка­ккулт, шаэртал, чичулт, журналистал, музыкантътал ва цаймигу къуллугъчитал, шаэрнал ва художникнал гъанчу, дустал. Выставкалий дирхьусса суратирттацIун Сугъурил ишла бувну бия цала шаэрналмур гьунаргу – гьарца суратрацIун, сипатрацIун чирчуну дия назмугу, мунил залуннал пагьму-гьунардания, касму-сянатрая бусласисса.

Выставка барча дуллалисса ихтилатру бунни Шалласу Шалласуевлул, медициналул элмурдал академик ХIусман ХIусмановлул, искусствоведениялул кандидат Мариян Чалабовал, Гьарун Саэдовлул цIанийсса фондрал хъунама Давди Увайсовлул, философиялул элмурдал доктор Асият Буттаевал, ДР-лул Художниктурал союзрал председатель Кьурбанаьли МахIаммадовлул, ДР-лул Художниктурал союзрал выставкартту дувай залданул директор Амирхан МахIаммадовлул, ДР-лул халкьуннал художник МахIаммадаьли Аьлиев­лул ва цайминнал.

Художникнан пишкашран мунал цала мукъурттийсса балайрду щаллу бунни Мурад Къажлаевлул искусствалул школалул оьрчIал хорданул, Саният Рамазановал, Жанна Кьурбановал, Шагьалай МахIаммадовал, Ямлихан ХIажиевлул.
Шаэр, художник Сугъури Увайсов барчаллагьрай ур цанма ва давриву кумаг бувминнайн. Бусраврай кIицI лаглай ур, цалла дирхьусса давуртту итталун дагьну, цува ва выставка даврийн гьуз учин увсса Мариян Чалабовайн, Республикалул Халкьуннал творчествалул къатлуйн.

Читайте также: