Декабрьданул 3-нний ДР-лул БакIчи Владимир Васильевлул каялувшиврий хьусса оператив батIаврий ххал бивгьунни Аьрасатнал Президентнал тапшурлугъру бартдигьаврил масъала.
Ми тапшурлугъру Владимир Путиннул дурну диркIссар гьашину июльданул 6-нний ДР-лул БакIчинащалсса хьунабакьаврий.
БатIаврий ххал бивгьунни мукьва томограф ласунсса арцу федерал бюджетравату личIи даврил масъала. Яла вичIи дирхьунни Бущихъиял райондалул азарханалун компьютерданул томограф ласаврил хIакъиравусса хаварданух. Муния бувсунни ДР-лул цIуллушиву дуруччаврил министрнал 1-ма хъиривчу Файзуллагь ХIабибуллаевлул. Мунал тIимунийну, гьашину томографру ласунсса арцу къадуркIун дур, ми ялун нанимур шинал итадакьин ккаккан бувну бур.
Хъирив ххал бивгьунни Дагъусттаннал МЧС-рал инсантал ххассал баврил центрданун вертолет личIи даврил масъала. МЧС-рал управлениялул каялувчинал хъиривчу Олег Халиловлул тIимунийну, вертолет Дагъусттаннахьхьун дуллуну дур ва хIадур увну ур 15 летчик.
Яла ххал бивгьунни Каспийскалий хьхьирил жамирду бакьин байсса завод зузи баврил масъала, муния ихтилат бунни ДР-лул промышленностьрал ва энергетикалул министр Сайгидпаша Оьмахановлул. Мунал бусаврийну, цIанасса ппурттуву хIадур буллай бур заводрал документру. Проектрал багьа бур 1 млрд ва 4 млн. къуруш.
Хъирив ххал бивгьунни федерал ххуллурдай апатIсса ишру чан хъананшиврул дуллалисса давурттал ишру. Муния ихтилат бунни ДР-лул транспортрал ва ххуллул хозяйствалул министр Ширухан ХIажимурадовлул. Мунал тIимунийну, гьашину 10 зуруй хьуну бур 473 апатIсса иш, миннуй ивкIуну ур 152 инсан.
БатIаврий ххал бивгьунни закондалий дакъа лахъсса къатри дуллалаврил ва миннул хьхьичIалу кьукьаврил хIакъиравусса масъала. Муния бувсунни ДР-лул строительствалул ва ЖКХ-лул министр Малик Баглиевлул.
ЦIумадиял райондалий 2 школа баврил хIакъираву ихтилат бунни ДР-лул дуккаврил ва элмулул министр Уммупазил Оьмаровал.
Дагъусттаннал БакIчинал тапшур бунни батIаврий ххал бивгьусса цинявппагу масъалартту бартбигьаврил ялув бацIаву дуван.
