«Уттигъанну, оьрчIал цIуллу-сагъшивруцIун бавхIуну, на цIухху-бусу буллай буссияв ххуйсса хIакиннал хIакъираву. ЧIаххувщарнил ттун маслихIат бувна Коркмасовлул цIанийсса кучалийсса (№14) «Целитель» клиникалий зузисса лор-хIакин МахIаммадхан МагьдиевлучIан гьан.

Имара Саидова
— Ххуйсса пишакарди, жула лаккучури цувагу. Нагу цайминнал маслихIат бувну лавгссияв, рязину ливчIра, — тIий дия чIаххувщар.
2010-ку шинал Ккурккуллал дянивмур даражалул школагу къуртал бувну, МахIаммадхан увххун ур Дагъусттаннал медициналул академиялувун.
Му къуртал байхту, ца шинайсса интернатуралий ивкIун ур, отолорингологнал пишалул кIулшивуртту куртI дуллай Республикалул чIяру профиллу дусса оьрчIал азарханалий. Шикку ва итталун агьну ур Дагъусттаннал оьрчIал хъунама отолоринголог Дибиров Запир Загьидовичлун. Ванал оьвкуну бур МахIаммадханнуйн архIала цаламур клиникалий цала ассистентнугу зун.

— Дуккавугу, давугу ар­хIал дачин дан бигьану къабивкI­хьурчагу, ттула кIул­ши­вуртту куртI дан, пиша лахьхьин муния ттун хъунмасса мюнпат хьунни, — тIий ур МахIаммадхан.
КIира шин хьуну дур ванал Энгельслул ку­ча­лийсса Запир Дибировлул лор-клиникалий зий. Ххуйсса пишакарная бакъавну къабикIай, хаснува ва аралуву зузиминнан. ХIарачат бусса, вихшала дишин бучIисса хIакинная бавну бур «Целитель» клиникалул хъуниминнангу. Оьвкуну бур МахIаммадханнуйн цачIавагу зун. Шикку зий хъунма хIал къавхьунугу, ванал цIа дургьуну букIлакIисса къашайшалт чан­сса бакъар. Ва кьамул буллай ур ссят 8.30-нния ссят 13.30 бияннин, алхIаткьини личIаннин, щала нюжмардий. Кьамул буллай ур, вилттили оьрчIая оьрмулул бугьараминнайн бияннин.

— Дянивну 30-40 инсан ца кьини кьамул ан багьай. Жул пишалуцIун дархIусса вичIал, майлул, кьакьарттул азарду Да­гъусттаннай лапра чIяруну хьунадакьай хъартусса климатрацIун дархIуну. ЧIявуми пациентътал оьрмулул 3 шиная 16 шинавун бияннинсса бикIай. ЧIявусса оьрчIру бур аденоидру, хронический тонзилитру дусса. ЦIана на ттула пишалийн дагьайсса азарду хъин дуллай, профилактика дуллай зий ура. Ялун операциярттугу буллансса пикрилий ура. Пикри бур мукунма эстетикалул медицина ахттар дулланссагу, — буслай ур хIакьинусса даврия ва ттиния тихуннайсса планная МахIаммадхан.

[dropcap]В[/dropcap]анал дахIаву дур Москавуллал, Санкт-Петербургуллал хьхьичIунсса лор-хIакин­ту­ращал. Иш багьний, миннащал маслихIатгу кка­ккай. МахIаммадхан шяравун ув­кIукун, шяравумигу рязи шай. Дирирсса сант ишла дурну, цIухху-бусу бан, дару-дарман цIуххин ваначIан бачай.
ЦIуллу-сагъшиврул буруккин бусса инсаннан кумаг бавунияр чирисса цичIар дакъахьунссар.
ДакI ххари шай жагьил­сса пишакартураву цала даву ххира­сса ва ххуйну кIулсса хIакинтал хьунабавкьукун, миннайн хъар хъанай тIий жула медициналул бучIантIимур. Вайннал дуллалимуницIун Заннал кабакьиннав.

Магьдиев Аьбдулвагьаб, техникалул элмурдал кандидат, ш. Москав:
— МахIаммадхан школалий дуклакисса чIумал, на Ккур­ккуллал школалий зий уссияв. На ванахь химиялул, биологиялул дарсру дирхьуссар. Ва чIивинийва медициналух эшкьи хьусса оьрчI ия. ДакIний бур, чIивиний ва хъуннасса кIяласса халат ва колпакгу бивхьуну, санитарнал сумкалущал духтур хьуну занай ивкIсса. На дарс дихьлан ивкIсса чIумал, хъуними классирттаву, ва хасъсса литература бучIан буллай, ккалай, хъинну химиялухун, биологиялухун агьну ия.
Ва медициналул институтравунгу увххун, мивугу ххуйну дукланшиврий ттул хъис щак бакъая. МуницIунма, ва авкьусса, аьчух­сса, хъунаманал хIурмат бусса, захIмат ххирасса оьрчIгу ия.

Ца чIумал на увцуссия ва ттула багъравусса мурхьирдай жалгъа бан. Муксса усттарну бувна­хха, цинявппа лавчIуна. Аргъирай буссар ванал жалгъа був­сса мурхьру.
ЦIана на Москавлив ура. Муная ххуйсса хаварду баллай, дакI ххари хъанан дикIай. Щак ба­къар МахIаммадханнуя ххаллилсса пишакар хIисаврай ттиния тихунмайгу баллантIишиврий.

Эльмира Дибирова, коллега:
— МахIаммадхан жул клиникалий зий 2 шин хьухьунссар. ЧIирисса чIумул дянив ва ххира хьунни щала коллективран ва клиникалул пациентътуран. Ххуйсса тарбия ларсъсса, мяърипат дусса, дакI хъинсса жагьилгу, ххаллилсса хIакингу ур.
КъадакIнийри ва цалагу даврийн чIал хьуну, даврил чулухуннай баччибакъашиву дурну. Низам ххирасса, жаваблувсса ва цаяра тIалавшинна дусса зузала ур. Ци даву тапшур дарчагу, лажин кIялану бартдигьай. Цалчинсса шиннардийва укун сивсуну зузисса хIакиннал цаятува ттигу баян банссар тIий бура. МахIаммадханнун дакIнийхтуну тIайлабацIу чIа тIий бура.
Жугу чIа тIий бура ванан давриву тIайлабацIу ва хьхьичIуннайшивуртту.