Луттирду оьрмулул мяънану хьусса чIумал

ТIагьират Алескерова

Р. ХIамзатовлул цIанийсса Национал библиотекалий хьунни библиотекалул даврил ветеран Султанова Кубра Кьурбанаьлил душ дакIнийн бутлатисса аьпалул вечер.

АьФ-лул ва ДР-лул культуралул лайкь хьусса зузала Кубра Аьлиевнал цIа къабавсса республикалул магьирлугъраву, хаснува библиотекалул давриву, чансса бухьунссар. Гьашину мунин там хьунтIиссия 80 шин.


Гьарун ХIасанов

Бадрижамал Аьлиева
Аьпалул вечер сакин дурну дия Национал библиотекалул культуралул программарттал отделданул, мажлис бачин бувнугу бия му отделданул хъунмур Муслимат Абакарова.
Ва кьини библиотекалул кон­фе­ренц-залданувун цала даврил уртакь, маччадуш дакIнийн бутан бавтIун бия республикалул библиотекарттал зузалт, лакрал личIи-личIисса шяраваллал ва дагъусттаннал цайми миллатир­ттал вакилтал.

Дагъусттаннай библиотекалул даву цамур журалийн, цамур даражалийн хъит учин давриву Кубра Султановал бивхьусса захIмат кIицI буллалисса гьарта-гьарзасса ихтилат бувна Национал библиотекалул директор Аьли Аьлиевлул.
Кубра Султанова гьурттусса Национал библиотекалул тарихрая бувсунни культуралул программарттал отделданул хъунмур библиотекарь Ольга Аьлиевал.
БавтIминнащалсса видео­дахIаврийсса ихтилатрайн увккун ия чIярусса шиннардий Национал библиотекалий зий ивкIсса, Кубралул уртакьну ивкIсса, цIана Ростоврай Донской библиотекалий зузисса Михаил Мун.

Кубра Аьлиевна дакIнийн бутлатисса ихтилатру мукунма бувна Н. Юсуповлул цIанийсса Респуб­ликалул ОьрчIал библиотекалул директор Султанат Загьидовал, Дагъусттаннал халкьуннал шаэртал Космина Исрапиловал ва Сугъури Увайсовлул, ДГУ-лул Элмийсса библиотекалул директор Лариса Тананыкинал, Республикалул ОьрчIал библиотекалул методикалул отделданул хъунмур Лилия Удаловал, Б. Мурадовал цIанийсса Дагъусттаннал культуралул ва колледжрал искусствалул директорнал хъиривчу Жарият Хаппалаевал, Республикалул ОьрчIал библиотекалул зузала ТIагьират Алескеровал, искусствовед Мариян Чалабовал, Национал библиотекалул директорнал хъиривчу Сарат Жабраиловал, Кубращал дусну бивкIсса Шагьрузат Аьлиевал, Нуриян Темирбулатовал, Шамай Маммаевал ва м.ц..
Ихтилатирттал лях-карах балайрду щаллу буллай бия ДР-лул искусствалул лайкь хьусса иш­ккакку Жанна Кьурбанова.
Кубра Султановал арснал Аьвдулкьадирдул барчаллагь увкуна цала ниттил аьпалул ххуллий укунсса журалул давуртту дуллалиминнахь. Гъан-маччаминнал чулухасса барчаллагьрал махъру мукунма увкуна Гьарун ХIа­сановлулгу.