[dropcap]В[/dropcap]ай гьантрай ЧIяйннал шяраватусса Ибрагьимов Ибрагьимлун хъанай дур оьрмулул 80 шин.
Мукунна Ибрагьимлул ва ванал кулпат Жариятлул цачIу оьрму бутлайгу там хъанай дур 50 шин.

 

Увну ур 1938-кусса шинал ЧIяйннал шяраву. Бувккуну бур Ростовуллал политехникалул техникум, Щалагу союзрал электротехникалул институт. Зий ивкIун ур МахIачкъалаллал 206-мур СМУ-лул прорабну, отделданул хъунаману, Дагъус­ттаннал МВД-лул системалий нормативрал ва техникалул даврил инженерну, «Дагсельстрой» трестрал проектирдал комитетрал хъунаману, СМУ-лул хъунаману.
Ванал хIалал дурну дур «Дагъусттаннал лайкь хьусса строитель» тIисса цIа, ва ур захIматрал ветеран, дур чIярусса грамотартту.
Вай гьантрай Ибрагьимлун хъанай дур оьрмулул 80 шин. Мукунна Ибрагьимлул ва ванал кулпат Жариятлул цачIу оьр­му бутлайгу там хъанай дур 50 шин.

---

1. Цукунсса хьуна оьрчI­ний вийнма яла гужсса асар биян бувсса зат, иш?
-1943 шинал сентябрь зуруй бувкIуна жуннийн шаппай шяраваллил бакIчитал – жул ппу Ибрагьимов РахIим Хъун дяъвилий ивкIусса баян бан. Му чIумал жу, ххюягу оьрчI, ятин хьуссару.

2.Цими никирайн дияннинсса кIулли вин вила ппухълуннал нясав?
— Вана му нясаврал шанна никирайн дияннинсса цIарду:
Аьлил – мунал арс Ибрагьим; Ибрагьим – мунал душ ПатIимат, арсру ХIажи, Рамазан, МахIаммад, Аьбдулкьасин, РахIим. РахIим – мунал арсру Аьбдулкьасим, МахIаммада, Ибрагьим, душру ПатIимат, Аьйша.

3.Инсаннал хасиятраву винна яла ккарккун къаччимур лишан?
— Ламмамшиву, бакъу бишаву.

4. Вила оьрмулуву яла алши бакъамур шин?
— ЗахIматсса шинну дия бу­тта акъа дирчусса шинну. Университетравун дуклан ухлай, кIира экзамен дуллуссия: математика – 5, физика – 4. Сочинениялул 2 лавсун, уххан къавхьуну, шавайн къалавгун, военкоматрайн лавгссияв армиялийн уца тIий. Увцунав.

5. Яла алши бумур шин?
— Армиялия увкIун, увхра дук­лан Ростовуллал связьрал политехникумравун. Цалчинмур се­ссия буллуну махъ ттун лахъсса стипендия бивхьуна, навагу лаборантну кьамул увнав. Къуртал бувкунгу, гиккува ивтунав дарс дихьлан, семейний общежитиягу булунну куну. Амма Связьрал министерствалул на тIайла увнав Дагъусттаннал ПМК-лийн. Муния махъсса шинну гьаксса алши бусса дия.

6. ВичIара циксса арцу хьувкун, дигьалаганссия дакI?

— На зузисса къуллугъру, гьай-гьай, бия хъинну къачан­сса арцу хьун дан шайсса. Нарив гьарцагу нава зузисса кIанттай лажин кIялану зий ивкIра, муния цIанакулгу дакI ххарину икIара. Арцу гьарза хьувкун, гьарза шайссар бакIрансса цIуцIавурттугу. Ттун цIими хъа­нан бикIай ттущалва зий бивкIсса цаппара инсантурай: кув чIун дакъа оьрмулува лавгунни, кувннангу дуснакьру нясив хьунни.

7. Инсаннал тахсирдавасса цумур хьунссия вища бигьану багъишла битан?
— КъакIулну, хатIалий хьу­сса тахсир.

[pullquote]На зузисса къуллугъру, гьай-гьай, бия хъинну къачан­сса арцу хьун дан шайсса. Нарив гьарцагу нава зузисса кIанттай лажин кIялану зий ивкIра, муния цIанакулгу дакI ххарину икIара. Арцу гьарза хьувкун, гьарза шайссар бакIрансса цIуцIавурттугу. Ттун цIими хъа­нан бикIай ттущалва зий бивкIсса цаппара инсантурай: кув чIун дакъа оьрмулува лавгунни, кувн­нангу дуснакьру нясив хьунни.[/pullquote]

8. Бувагу къабитан?
— Банна тIий бувсса оьбала.

9. Ссан диял къашай вил чIун?
— 1992 шинал на увчIунав МахIачкъалаливсса ЧIяйннал жяматрал диаспоралул хъунаману. Жагьилний бюхъаймур байссия, ттучIана кумаг ба тIий увкIсса цаягу лаккучу щаллу къаувну къаитайссия. Утти навагу инвалид хьуна ура, ттуйвасса буржругу багьайсса куццуй щаллу бан къашай. ЧIивиния шинай зий аьдат хьусса инсаннан тачIав диял къашайссар чIун.

10. Бартлавгун ччисса вила шанма мурад.
— Дяъвилул чIу къабаяннав. Лак цаннан ца бувчIлай, цаннал чIарав ца бацIлай личIаннав. Ттуламиннал дард ттуйнна къадияннав.

11. Вила оьрмулуву хъинну ххирасса кIантту бувгьусса шама инсаннал цIарду?
— Аьрая зана къавхьусса ппу РахIим. Жу, ххювагу оьрчI, ччаннай бацIан бувсса нину Сяъдижат, хъунмур ссу ПатIимат. Мукунна кIицI дан ччива жула чIарав авцIусса ХIамидов Ма­хIаммадлул цIагу.

12. Винма ххуй бизай­сса хъамитайпалул сурат?
-Ттущалва 50 шинай оьрму бувтсса ттулва кулпат – Жарият.

13. Вина кьамулсса чув-адаминал сурат?
-Ттула ниттиуссу Дамадан-ХIажи.

14.Агарда бюхъайсса бивкIссания, инава ци кIанттай, ци чIумал увну ва ци билаятрай яхъанай ччива вин?
-Нава увсса ттула буттал, ЧIяйннал, шяраву.

15. Ссаятусса бикIай вил яла хъунмур пахру?
-На рязину икIара нава бувт­сса оьрмулий, ттулва кулпат­рай, вайннал оьрчIай. Пахру бан лайкьсса дур Дагъусттаннал ххуйшивуртту, виртталсса арсру.

16. Цукунсса дур вил виятурасса къарязишиву?
— ЧIярусса данна тIий унува ттула жяматрансса давуртту, чансса дакъа дан къархьунни.

17. Яла къаххирамур дукра?
— Ккашигу, захIматгу ккавк­сса инсаннан къаххирасса дукра къадикIайссар.

18. Яла ххирамур дук­ра?
— Ккашил хьусса чIумал канакимур дукра. Ххирар лакку хъюрув, ххирар кIарттул ччатI яттил нисирахун.

19. Ссаяту бикIай вила хъунмур хIучI?
— ЦIанасса чIумух урувгун, дяъви къахьуннав тIисса, ттунма ккавкмур оьрчIан къакка­кканнав тIисса.

20. Хьуссарив вил оь­р­мулуву винна инара ттинин ба­гъишла ритан къахъанахъи­сса къел?
— Мукунсса къел ттущара хьусса ххай акъара. Амма сси­ттувух хьусса цаппара тахсирду бухьурча, багъишла итанхьува тIийгу ура.

21. Лавгсса заманардавасса цIанихсса инсантурава­сса цуманащал хьунаакьин ччива вин?
— Ччива тIун икIара буттащал хьунаакьин, цукунсса ивкIссарив ттуна къаккавккун тIий. Буттал ниттил агьулданущалгу ччива хьунаакьин.

22. Цукунсса бур, вил пикрилий, лакрал миллатрал яла хъунмур буруккин, цукунсса бур мунил ялун бучIантIимур?
— Жула буттал улчагу кьабивтун, ппив хьусса агьлу, леркьсса буттал къатри, хъамабитлати­сса лакку маз, буттахъал аьдат­ру. Зунттал щархъавун вари чин­сса ххуллурду бакъашиву. ХIакьинусса кьинигу газ зунттавусса лакрал районнайн къабувцуну бушиву.

23. Ци дахчилай дур хIакьину Дагъусттаннахун, цила аьнтIикIасса кIанттун ва надирсса миллатирттан лавхьхьуну, ххуйнугу, ххаллилнугу ялапар хъананшиврул?
— Духлаган дан къахъанахъи­сса коррупция, кланну.