Аьрасатнал Конституциялул кьини Дагъусттаннал Росгвардиялул зузалтрал дирхьунни ихтиярдал дарсру кIанттул школардай.
А. Аьбдуллаева
Каспийскаллал ОМОН-лул зузалт хьунабавкьунни республикалул КIулшивуртту дулаврил центрданул 6-мур классрал дуклаки оьрчIащал. ОьрчIан бувчIинсса куццуй вайннал бувсунни Аьрасатнал Конституциялия, билаятрал агьалинал ихтиярдая ва буржирдая.
— Конституция – жула билаятрал агьамсса документри, му кIулну бикIан аьркинссар гьарица инсаннан, дуклаки оьрчIангу, — кIицI лавгунни Каспийскаллал ОМОН-лул хIаписарнал.
«Ястреб» СОБР-лул зузалтрал укуннасса дарс дирхьунни цала аякьалийн лавсъсса М. ХIажиевлул цIанийсса кадетътурал школа-интернатрайгу. Билаятрал агьаммур законну хъанахъисса Конституциялия бакъассагу, вайннал бувсунни оьрчIахь республикалий Конституциялул строй дуручлан багьсса 90-ку шиннардия.
Аьрали отделениялул хъунаманал, бувсунни оьрчIахь СОБР-лул тарихрая ва къуллугърал буржирдая. ОьрчIру гъирарай вичIи дирхьуну бия вайннал бусласимуних, буллай бия личIи-личIисса суаллу. Хьхьирил школа-интернатрал директор Оьмар Оьмаровлул преподавательтурал ва кадетътурал цIания барчаллагь увкунни Росгвардиялул зузалтрахь жагьилтал ватан ххирану тарбия бавриву хъуннасса гьурттушинна дуллай тIий ва маслихIат бунни укунсса хьунабакьавуртту ччя-ччяни дуллан.
