Ноябрь зурул 28-нний ЦIуссалакрал администрациялий хьунни Дагъусттаннал БакIчи Владимир Васильевлул сипталийну дачин дурсса «Щюллисса манзиллу» тIисса акция.
Акциялул лагрулий ЦIуссалакрал райондалий, Гьамиящату байбивхьуну, Герзельлайн бияннинсса ххуллул чIарах бувгьунни 600-нийн бивсса кIяла тIутIул (акациялул), чинарданул, ясеньдалул мурхьру. Мукунма, райондалул школалул ва детсадирттал хIаятирттаву, лагма-ялтту бувгьунни 800 ахъулссаннул мурхь. Гихунмай къуллугъ булланшиврул гьарца бувгьусса мурхь тапшур бунни ца-ца дуклаки оьрчIайн. Ва давриву гьуртту хьунни райондалул администрациялул ва личIи-личIисса идарарттал зузалт, шяраваллил бакIчитал ва райондалул мажлисрал депутатътал.
ЦIуссалакрал райондалул каялувчитурал мудангу хъуннасса къулагъас дур райондалий марцIшиву дуруччаврих ва щюллишиву дугьаврих.
Райондалул бакIчи МахIаммадхIажи Айдиевлул кIицI лавгунни укунсса давурттал, экология дуруччаврицIун, жяматгу цачIун байшиву.
Райондалул хъуниминнан пикри бур укуннасса акция ЦIуминалийгу сакин дан, дакIнийну бур тиккугу 600 мурхь бугьан.
Андриана Аьбдуллаева
