ВиричуначIа хъамалу

ВиричуначIа хъамалу

Ватандалул вирттаврал кьинилуцIун бавхIуну Дагъусттаннал Росгвардиялул управлениялул зузалт ва аьралитал хъамалу бувкIунни МахIачкъалаллал ОМОН-лул командирну ивкIсса Аьра­сатнал Виричу Загьид ЗагьидовлучIан.


Андриана Аьбдуллаева

Загьид Загьидовлул бувсунни хъамаллурахь цала оьрмулия, мукунма цува гьуртту хьу­сса спецоперациярттая. Загьидов Авгъан дяъвилул ва республикалий хьусса дяъвилул ишир­ттал участникри. 2005 шинал май зурул 16-нний Къизилюрт шагьрулий ярагъуннил балгусса террористурайн данди бавцIусса операциялуву Загьидовлуйн захIматсса щаву дир­ссар, амма хIакинтураща ва ххассал ан бювхъуссар.
ЦIанасса Дагъусттанная ва дагъусттанлувтурая цIувххукун, Загьидовлул увкунни: «Ттун ччива дагъусттанлувтал тай жула республикалийн боевиктал ххявхсса 90-ку шиннардий кунма кувннал кув бувгьуну».

Виричунал бувсунни хIакьи­нусса кьинигу цува жяматий­сса иширттавух гьурттуну ушиву, школардайн, вузирдавун жагьилтуращал хьунаакьин лагайшиву ва жагьилминнахь чувшиврул дарсру дишайшиву. Росгвардиялул аьралитурал Виричунан дакIний личIансса бахшиш дунни ва барча унни му Дагъусттаннал Росгвардиялул управлениялул хъунама, полициялул генерал-майор МахIаммад Баачиловлул цIания.
— Аьдатравун багьсса ку­ццуй, гьарица шинах, Ватандалул Вир­ттаврал кьини гъан хъана­хъисса чIумал, жу бияйссару Аьра­сатнал Виричунал цIа ларсъсса жула дагъусттанлувтурачIан ва миннал кулпатирттачIан. ХIарачат бару вай давурттавун жагьилсса зузалт ва аьралитал кIункIу бан, мигу гъанну кIулну бикIаншиврул жула Вирттавращал. Укунсса хьунабакьавурттай Вирттаврал бусай жагьилминнахь ихтиярду дуруччай органнавусса къуллугърая, бай мюнпатсса маслихIатру, — тIий ур Дагъусттаннал Росгвардиялул управлениялул хъунаманал кумагчи, полициялул полковник Константин Шиян.

Читайте также: