АрвахIкьини, октябрь зурул 3-нний, Дагъусттаннал аьра­ли комиссариатрай хьунни ссу­ттилсса призыврал хIакъиравусса пресс-конференция.

ДР-лул аьрали комиссар Дайтбек Мустапаевлул бувсунни октябрь зурул 1-нния шихуннай ссуттилсса призыврал кампания дайдирхьушиву, Аьрасатнал Президентнал амрулийн бувну аьралуннаву къуллугъ бан буцинтIишиву 132 азаллий 500 инсан. Дагъусттаннал аьрали коми­ссариатран ккаккан дурсса наряд­райн бувну, Дагъусттанная буцин тIий бур аьралуннаву къуллугъ бан 1000 инсан, миннава 200 инсан – Национал гвардиялул аьралуннаву къуллугъ бан. Призыврал компания дайдишаврицIун бавхIуну, хьунни шагьрурдал ва районнал призыврал комиссиярттал батIавуртту.

---

Андриана Аьбдуллаева
Аьралуннаву къуллугъ буллан буцинтIий бур, Аьрали комиссариатрал тIайла бувккун аьра­ли пиша лавхьхьусса, ларайсса кIулшивуртту ларсъсса ягу хасъсса дянивмур даражалул кIулшивуртту дусса жагьилтал, мукунма, ци-бунугу багьана хьуну, къуллугъ бан къабувцуну бивкIсса жагьилталгу.
БуцлантIий бур контрактрай къуллугъ булланмигу.
Контрактрай къуллугъ бан буцлай бур цивппа рязисса ларайсса даражалул ва дянивсса даражалул хасъсса кIулшивуртту ларсъсса жагьилсса чиваркI.

Республикалул аьралуннавун наними батIайсса пунктрай шагьрурдал ва районнал аьрали коми­ссариатирттай хIадурну дур къуллугъ бан наниминнансса хасъсса лаххия, дука-хIачIанмур ва чара бакъасса аьркинмур дирхьусса кьуцуртту.
Жагьилтурал къуллугъ бантIи­ссар аьралуннаву ца шинайсса.
Инттусса призыврай Дагъус­ттанная къуллугъ бан увцуну ур 1390 инсан, миннава 420 инсан (30,5%) – ларайсса кIулшивуртту дусса.

Ссуттилсса призыврай 300 инсан чанну уцлай бур, амма ххишалану буцинтIий бур контрактрай къуллугъ буллантIими. ЦIананин 800-нния ливчусса инсантал гьан бувну бур контрактрай къуллугъ буллан кьиблалул аьрали округрал соединениярттавун, шинал ахирданийнин ттигу 900 инсан гьан антIий бур.
ХьхьичIмур призыврай аьрали сияхIрай ивхьуну ивкIхьурча 14 азара инсан, цIусса шинал февраль-март зурдардий сияхIрайн ласунтIий бур 17 шин хьусса 15 азара жагьил.
Ларгсса шинал Дагъусттаннал аьрали комиссариатран хIадур бан ккаккан бувсса С, Д, Е категориялул щупиртал – 571 инсан, циняв хIадур бувну бур ва циняв къуллугъ бан тIайла бувккун бур. Ми ба­къассагу, аьралуннаву къуллугъ бан тIайла увккун ур граждан идарар­ттай дуклай ивкIун, кIайва категориярдал щупиртурал ихтиярду ларсъсса 1000 инсан.

Гьашину Аьрасатнал Обороналул министерстволул дуккаврил идарарттавун уххан Дагъусттанная тIайла увккун ур 1003 жагьил. Миннава 332 жагьил 1-ми курсирдай дук­лай бур.
Аьрали комиссарнал мукунма бувсунни шинал лажиндарай жула аьралитурал хIакъираву частирдал командиртурая 10 барчаллагьрал чагъар бувкIшиву, шинай 3000 жагьил къуллугъ бан тIайла уккаву хIисавравун лавсун, ми хъинну чансса бушиву. МуницIунма бур жула оьрчIал мютIи бакъашиврул хIакъираву командиртурая бувкIсса аьрзригу.
Лакрал районнаясса жагьилтал вай царагу сияхIраву бакъая.