Аьвдуллагьлул арс Айгунов МахIаммад
Лахъисса мутталий къашавайгу ивкIун, оьрмулул 77 шинаву аьпалухьхьун лавгунни илданул дянив чIявуссаннан кIулсса, бусравсса,
лакрал миллатрайн багьайсса гьарцагу ишираву хьхьичIунну лякъайсса ивкIсса инсан, чумартшиврул бутIа ххисса чув-адамина, Аьвдуллагьлул арс Айгунов МахIаммад.
МахIаммад увну ур 1941-ку шинал ШавкIуллал шяраву. 1958-ку шинал Лаккуй дянивмур даражалул школагу къуртал бувну, увххун ур МахIачкъалаллал модельнайсса уссал фабрикалийн ученикну. Зийгу ивкIун ур га фабрикалий 1977-ку шинайнин, усттаршиврул циняв шачIанттугу бивтун, хъунама инженернал къуллугърайн ияннин.
1977-ку шинал МахIаммад ивтссар МахIачкъалаллал художествалул изделиярттал комбинатрал директорну, зийгу ивкIссар му даврий 1985-ку шинайн ияннин. Муния махъ, итххявхсса пишакаргу, сакиншинначигу хIисаврай, ва зий ивкIссар ДР-лул кIанттул промышленностьрал министрнал цалчинма заместительну, Дагъусттаннал швейный промышленностьрал генеральный директорну, МахIачкъалаллал протезрал ва ортопедиялул предприятиялул директорну.
ЛичIи-личIисса шиннардий МахIаммад Айгуновлул бувккуссар: Ростовуллал куклу промышленностьрал техникум; ЦК КПСС-рал партиялул Лахъсса школа; Дагъусттаннал университетрал экономикалул факультет.
ЛичIи-личIисса шиннардий МахIаммад увчIуну ивкIссар райондалул ва шагьрулул советрал депутатнугу. Ванан дуллуссар «ДР-лул соцобеспечениялул лайкь хьусса зузала» тIисса цIа. МахIаммадлун хIалал дурссар цаннияр ца ххаллилсса наградартту: ЗахIматрал ЯтIул ттугълил орден, «ХIурматрал лишандалул» орден, Дусшиврул орден ва чIярусса медаллу ва хIурматрал грамотартту.
Махъсса шиннардий ва бартбигьлай уссия биялсса жяматийсса мурадругу, нани дурну уссия Гъази-Гъумучиял щайх Жамалуттиннул цIанийсса фондрал давугу.
Аьвдуллагьлул арс МахIаммад аьпалухьхьун лагаврил пашманшивугу кIидачIлай, дакIнихтунусса жижара буллай буру ванал уссур-ссуннахь, душурваврахь ва махъсса цинявппагу гъан-маччаминнахь. Цал рухI алжаннул ххари даннав, гьав нурданул дуцIиннав.
ШавкIуллал жямат,
дустал, гьалмахтал
ДакIнихтунусса жижара буллай буру Айгунов ХIасаннухь, мунал ххирасса уссу
МахIаммад
ахиратрал шаврийн бувну. Цал бунагьирттал аьпа баннав, алжаннул ххари аннав.
«Илчи» кказитрал коллектив
Хъуннасса дард-хажалатгу кIидачIлай, дакIнихтунусса жижара буллай буру Сулайманов Юсуплухь, мунал уссу
ХIусайн
нязаннивсса оьрмулий жуятува батIул шаврийн бувну. Цал рухI паракьатний дишиннав, махънал оьрмурду лахъи баннав.
«Илчи» кказитрал коллектив
Хъуннасса кьурчIишиву кIидачIлай, дакIнийхтунусса жижара буллай буру Сунгъурдул арс Абакаров МахIаммадсанинал душваврахь ПатIиматлухь, Пахайхь, Эльмирахь, куявтурахь, ссурахъу Аьбдуллаев Ссапардухь ва махъсса циняввппагу гъанцириннахь, жуна цинявннанагу бусравсса, хIурмат ххисса
Сани
ахиратрал шаврийн бувну. Бунагьирттал аьпа баннав, гьав нурданул дуцIиннав.
Шалласу, Насибат
Халипанал арс Шайхмурадов Аьбдул
Оьрмулул 90 шинаву аьпалухьхьун лавгунни ххаллилсса кулпатрал заллу, лагма-ялттуминнангу, щала жяматрангу бусравсса, хIурмат ххисса инсан, Хьурттал шяраватусса Халипанал арс Шайхмурадов Аьбдул.
Аьбдул увну ур 1928 шинал Хьурттал шяраву. ЧIавану унува цала буттал шяраву зий-захIмат буллай ивкIсса инсан ур Аьбдул. Хъунмасса Буттал кIанттул цIанийсса дяъви байбивхьусса чIумал, ванан диркIун дур 13 шин, амма цувама колхозрал личIи-личIисса давурттай захIмат буллай ивкIун ур хъуниминнащал архIалну.
Цаппара хIаллава, щупиртал шайсса курсругу бувккуну, Аьбдул зун ивкIун ур ГАЗ-51 учайсса кьай духхай машиналий (кабиналийсса нузру тIаннул дусса чIумалвасса маркалул машиналий). Му машинагу тани, цамур транспорт дакъану тIий, ишла байсса бивкIссар гьарцагу ххуллу-ххуттай.
1957-ку шинал, Анжилийн ивзун махъ, ва зун ивкIссар АТК-2-лий (цIанасса АК-1209), цал щупирну, яла механикну. Микку зузиссаксса хIаллай, та чIумалсса бачIи бусса, бачIи бакъасса ххуллурдайх занай, кIинттулгу, гъинттулгу, личIишиву дакъа, Аьбдул уккайсса ивкIссар сайки щала Дагъусттаннайх.
Муния махъ зий ивкIссар АТХ-3 тIисса пассажиртурал автопредприятиялий. М-20 «Победа» маркалул такси занази бувсса цалчинминнавух хьуссар Аьбдул. Му даврий зийгу ивкIссар 1988-ку шинайн ияннин, яни пенсиялийн укканнинцIа.
Аьбдул ия гьарцаннащал хIал бавкьусса, дакI-аьмал авадансса, хъамал ххирасса, жяматрайн дагьайсса гьарцагу давривух чялишну гьуртту шайсса инсан.
Аьбдул аьпалухьхьун лагаврил жижара буллай буру ванал шамагу арснахь, оьрчIал оьрчIахь ва махъсса цинявппагу гъан-маччаминнахь. Аьбдуллул бунагьирттал аьпа баннав, рухI паракьатний дишиннав.
Хьурттал жямат
АхIмадлул арс МахIадов МахIад
Оьрмулул 78 шинаву жуятува личIи хьунни Вираттиял шяраватусса лайкьсса зунтталчу, хIурмат лавайсса чув-адамина, итххявхсса зузала, АхIмадлул арс МахIадов МахIад.
МахIад увну ур 1940-кусса шинал Вираттиял шяраву АхIмадлул ва Бахттуншал къушлий.
Школа къуртал бувну мукьах бувккуну бур МахIачкъалаллал механикалул техникум. Зий ивкIун ур М. ХIажиевлул цIанийсса заводрай мастерну, нормировщикну. Муния махъ, 1970-ку шиная шинай, зий ивкIун ур «Авиаагрегат» заводрай, цал хъунама инженерну, яла цехрал начальникну.
Пенсиялийн увккун мукьахгу зий уссия мува заводрал бигьалагай базалул начальникну.
МахIадлул хIалал бувссар архIал зузиминнал чулухасса хъунмасса хIурмат, кьадру. ЗахIматраву хьун дурсса хьхьичIуннайшивурттахлу ванан дуллуссар Промышленностьрал министерствалул цIаниясса ХIурматрал грамота. Ванал портрет чIярусса шиннардий лархъун диркIссар МахIачкъала шагьрулул ХIурматрал улттуй. Ва хъанахъиссар захIматрал ветерангу.
МахIад аьпалухьхьун лагаврил къумашивугу кIидачIлай, дакIнийхтунусса жижара буллай буру ванал кулпатрахь, арснахь, душварахь, щалвагу агьлу-авладрахь.
МахIадлул бунагьирттал аьпа баннав, махънал оьрмурдай барачат бишиннав!
Вираттиял жямат
