[dropcap]О[/dropcap]ктябрьданул 23-нний ДР-лул ХIукуматрал Председатель Артем Здуновлул дунни Дагъусттаннай инвестициярттал проектру дузрайн дуккан даврил хIакъиравусса батIаву.

ДР-лул ишбажаранчишиврул ва инвестициярттал агентствалул каялувчи ХIажи ХIасановлул тIимунийн бувну, хIакьинусса кьини хъинну агьамссаннун (приоритетные) ккаллину дур 33 инвестициярттал проект. Миннувух дур шинай 1 млн. тонна навтлия цайми сурсатру дуккан дайсса комплекс баврил проект ва 100 азарда тонна навтлил сурсатирттал ядайсса парк, «10 азарва бакI лухIи гъаттарал ризкьилул комплекс баву Къизлардал, Тарумовкаллал ва Бабаюртуллал районнай» тIисса проект (Кизлярагрокомплекс) ва цаймигу проектру.

Артем Здуновлул тIимунийн бувну, цаппара проектирдал хIакъираву уттигу бувар федерал банкирдацIун бакьин къабувсса масъалартту, миннувасса цаппара проектру бартдигьаву дацIан дурну дур, сиптачитал инкар шаву сававну. БатIаврий гьуртту хьуминнал ххал диргьунни приоритетсса гьарца проект личIи-личIину. Муния махъ Дагъусттаннал премьер-министрнал дунни балжисса тапшур бавуртту. БатIаврий ххал бивгьунни цаймигу масъалартту.