Махъсса ппурттуву «Сарикъумуллал барханну » тIисса заповедникрайн чIявусса туристътал занай бур, жулла респуб­ликалияссагу, цайми регионнаяссагу.

Ми кIул хъанай бур бархандалийсса ва мунил лагмасса аьрщарайсса ххяххиярттащал ва рухI дусса затирттащал. Бур миннуву инсаннан мюхчаншиву дан аьркинссагу.

 

---

ЦIанасса ппурттуву Сари­къумрай ашкара бувну бур инсаннан зарал биян бан бю­хъайсса 5 журалул ххялцулт, 1 журалул гъангъаратIи, 1 журалул чIяру ччанну дусса щулгъи (многоножка) ва 2 журалул хъаруду щулгъи.

Диялсса нигьачIаву дур къаракурт тIисса ххялцуя, мунийн «лухIи щащар » тIисса чIарах цIагу дирзун дур. Му бур лухIисса рангирал, мунил ххялцул чухъа щащайссар чар­тту бусса кIанттурдай, авлий бу­ккайссар хъуцIурдийн. Къаракуртлил загьру цимилгу ххишалассар тIар гремучая тIисса шатлулссаннияр.

Къаракуртлил кьацI увкушиву аьям бан захIматссар, цанчирча инсаннан мунил кьацI кушиву муданма асар къашайсса бур, так кIира ятIулсса ттангъа личIайсса дур, кьацI кусса кIанай. ЧIявумур чIумал, ганил кьацI кувкун асар шайссар ца лахIзалийсса гужсса къюву, ца 15-30 минутIравату му къюву ппив шайссар щала чур­ххавух. Гужсса къювурду дуллан дикIайссар лякьлул чулийн, бянивссаннийн, ттиликIрайн. Къашайшала ччясса мутталий иян уван аьркинссар яла гъанмур медициналул идаралийн.

НигьачIаву дуссар экьравраятугу (скорпион). Экьравир­ттал букайссар ххялцулт ва цаймигу ущу-щулгъив, миннул цалва загьру ишла байссар, цаярва хъунмасса давла бивчIан бувну, буканшиврул. Экьраврал кьацI увкусса чIумал, хъинну цIун бикIайссар.
Сарикъумрай буссар ницI дайсса найрдугу. ЧIявусса найрдал кьацI учаврия хъунна­сса нигьачIаву дуссар, инсан ивчIангума бюхъайссар. Найрал загьру гужсса аллергенни, мунил аллергиялул загьрулул шаву гужлан дуллалиссар. Миннуяр ххишала тикку буссар ца­ппара журардал гъангъаратIивгу, инсаннайн зарал биян бан бю­хъайсса.

ХIажимурад ХIабиев
ХIадур бувссар
ХI. Аьдиловлул