Шава ххункI канай унува, бартбигьа вила мурадру

Шава ххункI канай унува, бартбигьа вила мурадру

ХIакьину жула оьрмулувун, цуксса жунма ччайнугу, къаччайнугу, кьюч бивгьуну, дурххун нанисса зат дур Интернет. Шиная шинайн гьарцагу аралуву ялтту дуклай дур мунил каширдугу, биялагу.

Дур ва иширал цила диялдакъашивурттугу, миннуцIун чансса да­къар чIярусса къулайшиннардугу. Мисалдаран, цIана инсаннаща къатлул кьатIув къаувкнува, цанма аьркинсса информациягу кIул бувну, шава щяивкIун унува, налогругу, аькIригу, аьрзригу аьркинсса идаралийн тIайла буккан бюхълай бур. Ихтилатгу махъ ппурттуву халкьуннаву ялу-ялун гьарзану ишла буллалисса «госуслуги» тIисса му­къуяр.

Республикалул районнал ва шагьрурдал паччахIлугърал идарарттай «госуслугардацIун» дархIумур даву цIана ци даражалий дуссарив ва муницIун дархIусса тIалавшиннардугу цукунсса дуссарив бусласисса ихтилат хьунни ДР-лул Информатизациялул, дахIавурттал ва массовый коммуникациярттал министерствалул хьхьичIунсса пишакар, электрон хIукумат лябукку буну зузи даврил ялувсса отделданул хъунаману зузисса Аскандар МахIаммадовлущал.
-Аскандар, ссайн учай­ссар «госуслугарду» ва ци-ци журалул дуссар ми?

-«Госуслугарду» учайссар хIукуматрал цала халкьуннан дуллалисса хIаллихшиннардайн. Масалдаран, оьрчI бувкун, му­нал цIа-бакI чирчусса ча­гъар булаву, ташулул хьувкун, ЗАГС-рал чагъар булаву, къатта ягу аьрщи машан ларсукун «зеленка» булаву ва цаймигу хIаллихшиннарду. Дуссар кIира журалул хIаллихшиннарду-хIукуматрал ва муниципалитетирттал. Масалдаран, налогру, аькIри дулаву, паспорт булаву хъанахъиссар хIукуматрал хIаллихшиннардуну. Инсан ялапар хъанахъисса кIаная справка ласун, оьрчI школалийн ягу садикрайн гьан бан хьхьичI батIайсса чагъардал щаллушинна, аьрщарал дазурду рищаврил масъалартту тIурча, багьайссар муниципалитетирттайн
— Махъппурттуву билаят­рай чIявуну тикрал дуллай бур «электронные госуслуги» тIисса калима. Жула буккултрангу кIулну бикIан, бувсун ччива миннуя гьарза-гьартану, бувчIинну.

Хаснува цукунсса мурадрур бусса зулмур управлениялун щаллу бан багьлагьисса?
— «Электронные госуслуги» — ми халкьуннахьсса ихтиярди, интернетрайхчIин цала мурадру щаллу бансса. Масалдаран, интернетрал кумаграйну цIана жущава бюхълахъиссар даврий, шава ягу машиналуву щяивкIун унува, жуятура дагьайсса къатлухсса, аьрщарах­сса, транспорт­рахсса налог дулун, ягу жуйра дирхьусса аьчIа дулун. Мукунма жущава бюхъайссар хIат-хIисав дакъасса идарарттал жанахIирттавух къабуклай, шаппа бунува, лагма-ялттусса садик­ру, школартту ххал бувну, чивчуну миннал сайтрайн аьрза, «электрон сияхIрай» жула оьрчI бишин. Мукунма бюхъайссар паспорт ласунсса аьрза чичин. ХIасил, хIаллихшиннардал сияхI хъуннасса дуссар. Шиная шинайн хIукуматралгу му сияхIрай халкьуннансса къулайшиннарду ххи дуллай буссар.
Жулмур управлениялул мурад тIурча, хъанахъиссар республикалул идарарттай «элект­рон госуслугарду» щурущи даврил ялув бацIаву, микку ишла дувансса программарттал щаллушинна дуваву, районнал ва шагьрурдал муниципалитетирттай ва иширацIун дархIумур даврицIун кабакьу баву.

— Интернетращал «дус­шиву» дакъасса, муницIунсса занакьулушин лап хьхьарасса агьалигу чансса бакъахьун­ссар жула дянив. Инава тIийкун, идарарттал жанахIирттавух занай чIун аьдада гьан къадулланшиврул, мисалдаран, цири цалчин ттун бан аьркинсса?
-Мяйжаннугу, ттигу бувар жула халкьуннал «электрон госуслугардая» неъмат ласлан. ЦIанасса замана ккаллийссар анаварсса, инсаннай рахIму бакъасса, мобилсса заманалун. Муниятур жуятувагу интернетрал «ясиртал» хьусса. ХIакьинусса щаллагу дунияллул тагьарди ва.
Жула сайки гьарнал ужа­гъирттай бур комьютерду ва мобил телефонну. Цалчин, миннуй жула «личный кабинет» сакин баншиврул, МФЦ-лийн лавгун, жула страховой полисрал, паспортрал цIа-бакI дулун аьркинссар. Гикку яла вихьхьун булунтIиссар, ца вичIа бакъа щихькIуй къабикIантIисса, пароль. Му парольданийхчин, вища бюхъантIиссар, «гос­услуги» тIисса портал ишла дурну, «личный кабинетравун» бу­ххан. Дуссар ихтияр му пароль баххана бангу, му сакин бангу аьркинссар хъинну захIматсса, щинкIуй дакIнийн къадагьан­сса лишанная, хIарпирдая ва цифрардая.

Жул мазрай мунийн учайссар « личный кабинетрал кIула» куну. Му «кIула» ишла дурну, вища бюхъантIиссар Аьра­сатнал Пенсиярттал фонд­рал сайтрайхчIин вила та-бунугу ласунтIисса пенсиялул ялун ци дукIлай дурив ххал дан, мукунма бюхъантIиссар налогирттал ведомствалул сайт­райн бувххун виятура ци налогру дагьлай дурив ххал дан, ГИБДД-лул штрафру кIул дан. БюхъантIиссар мукунма аьрзри булун, миннухьхьунсса жавабирттащал кIул хьун.Сайки рес­публикалул циняв идарарттай цIана дуссар электрон журалул «госуслугарду» ишла дуллалисса, халкьуннал мурадру би­ттур буллалисса хасъсса отделлу. Миннал буржри, вил аьрзалух къулагъас дурну, ччясса мутталий вил мурад щаллу баву. Ми­кку ккаккан дурну дуссар вил цIаниясса аьрза кьамул був­сса чIун, кьини ва ккаккан дурну дуссар хасъсса идаралул мунилсса бансса чIун. «Госуслуги» порталданий инсаннал цала оьр­мулуву цал дакъа регистрация къадувай­ссар. Портал телефондалий дуни, хIаллихшиннардая кIилийнусса бигьашин хъана­хъиссар. Ттуща, кафелуву, даврий, цамур шагьрулий унува, бюхълай бур аьркинсса мурад щаллу бан. Масалдаран, вай гьантрай ттун багьлай бия, кка­ккан дурсса чIун лаглай духьувкун, машиналул «права» да­ххана дан. Увххун ГИБДД-лул сайтрайн, булав аьрза. Ттущара цIусса «права» ласун учIан хъанахъисса кьинигу ккаккан дурну, лавгра хъирив. Очерданий чувкIуй къаавцIуну, 5-10 минутрал дянив чагъаргу лавсун, увкра идаралува. ЦукунчIавсса бакIцIуцIаву дакъанна, очерданий бавцIуминнащал бяс-ччал къабувнува. Ва бакъасса, хIукуматрал идарарттал буржри «электрон очерданий» авцIума хьхьичIа-хьхьичI кьамул ансса.

ЦIана жул отдел , масалдаран, зий дуссар шагьрулул циняв поликлиникарттай, «элект­рон очередь» ишла дан ла­хьхьин даврил ялув. Цалсса ва даву щирикIин дурунни 1-мур ОьрчIал поликлиникалул каялувчинал. Къабигьархха нитти-буттан мюрщисса оьрчIащал поликлиникалул жанахIравух буклан ялугьлан. Мунияту цукссагу къулай­ссар порталданийхчин «электрон очерданий» бавцIуну, яла бучIан. Интернет къаххуйну зузисса зунттал щархъаву тIурча, вай хIаллихшинну ишла дан бюхъайссар къахъанан. Ми­ккугу районнайсса МФЦ-рдал хъуннасса даву дуллай буссар. Масалдаран, районнал администрацияртту буржлувссар цала хIаллихшиннарду электрон журалийн дуцин.

-Барчаллагь, Аскандар, халкьуннал чулухасса суаллахьхьун балжий­сса жавабру дулаврихлу. ТIайлабацIу баннав вингу, вил уртакьтурангу!
Ихтилат бувссар
Залму АьбдурахIмановал

Читайте также: