Октябрь зурул 9-нний, 1760-ку шинал Оьруснал аьралуннал Арулла шинал дяъвилий Берлин лавсъссар. Дянивмур Европанавусса кIира немецнал паччахIлугърал ччалаччаву гуж­сса данди бацIаврийн кIура дар­ссар.

Австрия ва Франция къарши бавцIуссар Англиянал ва Пруссия­нал паччахIлугъирттайн. 1756-ку шинал байбивхьуссар 7 шинай лахъи лавгсса дяъви (Семилетняя война). Пруссиянал каолициялийн къарши бавцIусса хIукуматирттал чул бугьансса хIукму бувну бивкIссар императрица Елизавета Петровнал 1757 шинал. Арулла шинайсса дяъвилий Аьрасатнал аьрал, цаннил хъирив ца ххувшавуртту ласлай, вайми хIукуматирттал аьралуннаяр цIакьну талай бивкIссар.
1759 шинал август зурул 12-нний КуперсдорфрачIа хьусса талатавриву оьруснал аьралуннал ххувшаву ларсъссар.
Му хьуссар 7 шинайсса дяъвилий вайннал ларсъсса ххувшавурттаву ца яла бюхттулмур. Муния махъри оьруснал аьралуннаща Берлин ласун бювхъусса.

***
1811 шинал октябрь зурул 14-нний Михаил Кутузов бакIчисса оьруснал аьралуннал Рущук шагьрулучIа ххит бувссар турк­нал аьрал. Туркнал визир ясир къаагьан кьюлтIницIух Болгариянавун ливхъссар. Язисса туркнал аьрал ккашил ва цIуцIавурттал ливтIуссар. ЛивчIсса 12 азара инсан щала артиллериялущал Кутузовлул канийн увкIссар.

***
1943 шинал октябрь зурул 14-нний нацистурал лагерьдай Собибордай хьуссар хъуннасса ва тIайлабацIусса восстание.
Лагерьдал система мукун­сса диркIссар, инсантурал дакIру гъагъан дуллалисса, къарши бацIансса гьавас бивчIан буллалисса. Амма 1943 шинал октябрь зурул 14-нний лагерьданий дуснакь бувми гьаз хьуссар.
Нацистурал Собибор лагерь бувну бивкIссар Польшанал аьрщарай 1942 шинал Европанавусса жугьутI бат бансса программалул лагрулий. Лагерь зий бивкIссар сайки шин ва дачIинний. Му чIумул мутталий шиву бат був­ссар 250 азаруннийн бивсса Польшанавасса ва цайми Европанал паччахIлугъирттаясса жугьутI. Лагерьданийн бувцуну бувкIми, «ХIаммамравун» куну, тIайла бу­ккайсса бивкIссар. Му бивкIссар газрал камера.
Газрал литIун бувми бакъа­ссагу, лагерьданий бивкIссар хозяйствалул давуртту дуллан бивтсса 500 инсан. Собибор лагерьданийминнал цаппаралилла кьаст лархIуну диркIссар лихъан, амма тIайлабацIу къавхьуссар.
1943 шинал ссуттихунмай Собиборданийн бувцуну бувкIссар ясир багьсса совет аьралитал – жугьутI. Миннавух ивкIссар Александр Печерскийгу. Ясир агьсса лейтенант Печерский шиккун агьаннин, мютIи къахъанай, лихъансса планну дичлай уну, ца лагерьдания цамунийн гьан уллай ивкIссар. Му жугьутI ушиву кIул хьуну махъ тIайла увкссар Собиборданийн.
Аьралитурал цалчинсса партия дуркIссар 1943 шинал сентябрь зурул 25-нний, 600 инсаннава 520 най буна аьщун бивзссар. Махъми хозяйствалул давуртту дуллан бивт­ссар. Миннавух ивкIссар дуснал тIаннул усттарда уча увкусса Печерскийгу. Печерскийн бувчIлай бивкIссар цала ахир цукунсса дикIантIиссарив, пикри бувссар фашистуращал махъра-махъсса талатаву дан. Ванал каялувшиву дурссар Собиборданийсса кьюлтIсса группалий ва хIукму бувссар циняв архIал лихъан.
ХIаписарнал бувчIин бувссар лагерьданувуми чIявуми литIун бюхъайшиву, амма, цаппара­сса бунугу, сагъну буккан бюхъайшиву.
Лагерьданувуми рязи хьуссар Печерскийл тIутIимуний.
Собибордай Печерскийл дурагу шанна нюжмар дурссар, амма мунаща бювхъуссар дуснакь бувминная аьркинсса куццуй сукку тIунсса кьюкьа сакин дан.
Октябрьданул 14-нний вайннал бат увссар 11 эсэсовец ва мадарасса украиннал полицайтал. Амма ливчIсса къаралданул леххаву руртун, дуснакьравуми ливхъссар.
Пулеметрава тIиртIусса ккуллардал цIарал ва лагмавасса авлахъирттай дирхьусса минардал чIявусса ливтIуссар. Амма тархъаншиврийн буккан бювхъу­ссар 300 инсаннаща. Миннава Печерскийщал Белоруснал аьрщарайн ливхъми сагъну ливчIссар, Польшанаву бавцIуми – сайки 90 инсан, коллаборационистурал ва жугьутI къаххирасса кIанттул инсантурал ливтIуссар.
Собибордайсса восстаниялул каялувчи Печерский Белоруснал аьрщарай партизантурал кьюкьраву талай ивкIссар. Белоруссия немецная мурахас бувсса чIумал, Печерскийхь контрразведкалул органнал («СМЕРШ») цIухху-бусурду буллай бивкIссар. Хъунмасса Буттал кIанттул цIанийсса дяъвилий Ххувшаву ларсъсса чIумал Печерский капитаннал чиндалуву ивкIссар. Ванал чивчуссар лу Собибордай хьусса восс­таниялия, Печерский ивкIуссар 1990 шинал. Му ивчIан шанна шинал хьхьичI Голливудрай ларсъссар «Побег из Собибора» тIисса фильм. 2018 шинал май зурул 3-нний машгьурсса артист Константин Хабенский режиссерсса «Собибор» тIисса Аьрасатнал фильмрал премьера хьуссар.
ХIадур бувссар
Андриана Аьбдуллаевал