Вай гьантрай Грознай шагьрулий хьунни Чачаннал республикалул хъуншагьрулул 200 шин шаврил юбилей.
Ва юбилейрал лагрулий дунни Ккавкказуллал халкьуннал культуралул ва спортрал 9-мур фестивальгу. Шагьрулул дязанивсса хъун майданнив Ухссавнил Ккавкказуллал агьалинал майданнаву ца яла ябацIанмур ва агьали нех дирхьуну нанимур майдан бия Дагъусттанналмур.
П. Рамазанова
Фестиваль тIитIаврил шадлугърай гьуртту хьунни Дагъусттаннал культуралул министр Зарема Буттаева ва физкультуралул ва спортрал министр МахIаммад МахIаммадов. Шадлугърайн увкIсса ДР-лул ХIукуматрал хъунама Артем Здуновгу, Инстаграмрай цала тIийкун, «хьхьичIва-хьхьичI ивунни дагъусттанналмур майдандалийн». Ванащал бивунни СКФО-райсса Аьрасатнал Президентнал полпред Александр Матовников, Ухссавнил Ккавкказуллал иширтталсса буллалисса министрнал цалчинма хъиривчу Одес Байсултанов, Чачаннал республикалул БакIчи Рамзан Кьадиров, Аьрасатнал регионнал хъуними.
Культуралул программалий гьуртту хьунни «Молодость Дагестана» ансамбльданул артисталгу. Спортрал бяс-ччаллил тIуркIурдавухгу дагъусттаннал спортсментурал хьхьичIунсса гьурттушинна дунни.
Шагьрулул юбилейрал кьини Рамзан Кьадировлул шагьрулул агьулданун хъунисса бахшишругу дунни: ахIвал кIюласса 200 кулпатран буллунни квартирарду. Вай машан ласунсса арцу дуллуну дур АхIмад Кьадировлул цIанийсса ихIсандалул фондрал. Вава фондрал харжирацIух, 200 хъатIигу му кьинилул савлугъран бунни. Хъамал ва шагьрулул агьлу, ябатIин къахъанай, тамаша бувну бивкIунни вайнахтурал аьдатрайн бувну, щинав нанисса 200 жалиндалий. МарцI-кIяласса жалин-гьухъравусса 200 душ варакъащал кьуллалийн нанисса аьдат ккаккан дуллалисса сюжетру дунияллал телеканаллайгу машгьур хьунни.
«Грозный-ситилул» гъинттулмур амфитеатрданувурив Аьрасатнал эстрадалул цIуртти Тимати, Валерия, Николай Басков, Авраам Руссо гьурттусса концерт ккаккан дунни.
Хъамал ряхва метра лахъишиврий, шанна ва дачIи утташиврий дусса хъунмасса тортрай хъамалу бунни.
Хъуншагьрулул юбилейгу, спортрал ва культуралул фестивальгу лахъсса даражалий хьунни чIаххурачIа.
