МахIачкъалаллал администрациялул пресс-службалул бусаврийну, «Мюхчаншиву ххисса ва ххуйсса ххуллурду» тIисса федерал программалий жула кучардай ча-чунгу нанисса хъуни давуртту къуртал шавай дур.
З.АьбдурахIманова
Ххуллурду бакьин буллай, асфальт бутIаврицIун най дуссар ххуллурдайх заназими нигьачIишиврия мюхчан бувансса давурттугу. Мисалдаран, къулагъасрай лавсун, бакьин буллай, цIу буллай буссар бахьттагьалтрансса ххуллурду, тротуарду, щупиртуран тийн-шийн буклан къадагъа дихьлахьисса «полосарду», бахьттагьалтрал ччи-ччиний ххуллурду къалахъланшиврул дирхьусса чапарду, ххуллул лишанну, уттизаманнул светофорду.
Хъун шагьрулул УЖКХ-лул техникийсса отделданул пишакар Хучбар Шабановлул бусаврийну, давуртту щириркIуну дусса дур цал архIал цимивагу кучалий. Мисалдаран, Насруттиновлул цIанийсса кучалий 200 м.манзилданийсса ххуллуцI чапарду дирхьуну къуртал шавай дур. О. Булачлул цIанийсса кучалий 18 консоль ва 2 светофор дирхьуну дур. Вайра давуртту дурну дур Аскерхановлул цIанийсса кучалийгу.
Аьмну ва федерал программалул лагрулий шагьрулул 86 км.манзилданийсса ххуллурду бакьин бантIиссар.
