[dropcap]О[/dropcap]ктябрь зурул 17-нний Керчь шагьрулул политех колледжраву оьзрусса иш хьунни. ПIякь учин бувну ва бивтун бивчуну оьрмулуцIа унни 20 инсан,
щавурду дирунни 50-нная ливчусса инсантурайн. Вай циняв бур колледжрал студентътал ва преподавательтал – 15 студент, 5 преподаватель. Щавурду дирминнаву 10 захIматсса тагьарданий ур.
Ва бала бувсса колледжрал 4-мур курсрал студент Владислав Росляковлул цанма цала бувну бур. ВаначIа лявкъуну бур ттупанча ва 150-нния лирчусса патронну. Цинявппа ливтIуминнал цIарду кIулну дур Къиримнаву, ххамискьинилия дайдирхьуну, шанна кьинисса дягъу баян бунни.
ЦIубутIуй «Террорист акт» статьялийн бувну сукку дурсса уголов дело утти «КIия ягу ххишаласса инсан оьрмулуцIа аву» тIисса статьялийн кIура даен дурну дур.
Силистталул кIул бувну бур бала бувсса студент му иш хьун хьхьичI увкIун ивкIшиву колледжравун ярагъгу канихьну. Криминалистурал ва следовательтурал ЧП хьусса кIанттурдай хъиривлаявуртту дунни. Уттигу бардултрахь цIухху-бусу буллайнма бур. ЧIал къавхьуну судрал ва медициналул экспертизартту дуллантIиссар.
Аьрасатнал Силистталул комитетрал хъунама Александр Бастрыкиннул му уголов дело тапшур дунни ведомстволул централ аппаратрайн.
