Татарсттаннайгу – Дагъусттаннал Халкьуннал цашиврул кьинит

Сентябрьданул 15-нний Татарсттаннал хъуншагьрулий Къазаннайгу, Дусшиврул къатлуву, кIицI ларгунни Дагъусттаннал Халкьуннал цашиврул кьини. Му дурну дур Татарстаннал хIукуматрал грантрацIух, Татарсттаннал Халкьуннал ассамблеялул кабакьаврийну.


Микку гьуртту хьун Дагъус­ттанная лавгун бур Миллатрал политикалул министерствалучIасса Жяматийсса советрал председатель Бадруттин Ибрагьимов каялувчисса делегация.
Микку хьуну бур «ккуркки стол». Мунивух гьуртту хьуну бия Татарсттаннал Халкьуннал ассамблеялул Елабуграйсса вакилханалул директор Зулайхат Амирбагова, Дарбантливсса Дунияллул культурардал ва диннал тарихрал музейрал директор Диана ХIасанова ва м.ц.

БавтIминнал хьхьичI ихтилат буллай, Татарсттаннайсса Дагъусттаннал халкьуннал сакиншиндарал каялувчи Шамил Гъазиевлул бувсун бур цалла дурсса ва дуван дакIнийсса давурттая.
Бадруттин Ибрагьимовлул бувсун бур Дагъусттаннай халкьуннал канил пишарду цIулаглай бушиву, хъамадитлатисса аьдатру зана дуванмур буллай бушиву.
«Ккуркки столданий» чирчуссар Татарсттаннал халкьуннал Дусшиврул къатлул, Дагъусттаннал халкьуннал сакиншиндарал ва Дарбантуллал тарихрал музейрал дянивсса уртакьшиврийсса зузаврил кьутIи.

Шадлугърал иширттавух «ЧIумул ххал» тIисса цIанилусса экспозициягу тIивтIуссар. Мукунна хьуссар «Дагъусттаннал халкьуннал мозаика» тIисса цIанилусса фестивальгу. Цинявппа хIала бувххун, хъуннасса концертгу ккаккан дурну дур.

ХIадур бувссар
Бадрижамал Аьлиевал