[dropcap]И[/dropcap]юльданул 10-нния августрал 15-ннийн бияннин, Ухссавнил Ккавкказуллал федерал округрал культуралул коммуникацияртту хьхьичIуннай даврил лагрулий, творчествалул проектру щаллу даву мурадрай, хьуссар «Дагъусттаннал халкьуннал творчествалул кьинирду Испаннаву». Миннувух гьуртту хьуну, уттигъанну махъунмай Дагъусттаннайн зана хьунни Республикалул Халкьуннал творчествалул къатлучIасса фольклорданул ва хореографиялул ансамбль «Эхо гор», УнцIукIуллал шяравасса цIа дурксса усттар МахIаммадаьли МахIаммадаьлиев.
Ми кьинирду хьуссар аслийсса искусствалул фестиваллал сакиншинначитурал советрал дуллалисса дунияллул халкьуннал дянивсса фестиваллал лагрулий.
Испаннаву Дагъусттаннал кьинирду сакин дурссар Республикалул Халкьуннал творчествалул къатлул ва Дагъусттаннал Музыкантътурал союзрал, АьФ-лул ва ДР-лул Культуралул министерстварттал чIарав бацIаврийну.
[dropcap]М[/dropcap]урсия, Фрехеналь де ла Сьерра, Нарон, Мугардос, Солейна, Ферроль, Вьяльба, Ас Понтес, Сафра, Риберо дель Фресно, Сантос де Маймона, Фортуна, Масарбес, Монтаргиль, Сан Дин, Вила Нова де Гайя, Гульпиарес, Вузела, Гувейя, Валега ва цаймигу шагьрурду – ва щаллу дакъасса сияхIри Дагъусттаннаясса артистътал бивсса, ца Дагъусттан бакъасса, чIяву миллатру бусса Аьрасатгу ккаккан бувсса.
Му проектрал лагрулий хьуссар 30-нния лирчусса концертру, выставкартту, фольклорданул шествияртту, шагьрурдал мэриярттавусса хьунабакьавуртту, халкьуннал къавтIавурттал ва канил пишардал мастер-классру.
«Дагестан мастеровой» цIанилусса выставкалул Испаннал агьлу ва му билаятрал хъамал кIул бувссар Дагъусттаннал халкьуннал канил пишардащал: бархъаллал тIахIунттащал, табасараннал бартбисурттащал, къумукьнал тастар-лачакирттащал, миллатирттал яннардавусса ссихьращал ва м.ц.
МахIаммадаьли МахIаммадаьлиевлул ккаккан дурссар цала карунних дурсса давуртту ва бувссар унцIукIуллал тIаннуй муххал накьичру дишаврил мастер-классру.
Дагъусттанлувтуращал архIал дунияллул халкьуннал дянивсса фестиваллай гьуртту хьуссар Мексиканавасса, Албаннавасса, Филиппиннаясса, Венгриянавасса, Колумбиянавасса, Кьиблалул Кореянавасса, Аргентиннавасса, Польшанавасса, Португалиянавасса ва цаймигу билаятирттаясса творчествалул коллективру.
— Испания бур Пиренейскаллал бачIижазиралул шанма билаятраясса ца. Испаннал ва Африканал дянив хъунма манзил бакъар, мунияту тикку муданмагу щуркIал хъанай бия лухIи континентрал кIирисса ссихI. Испаннал сипат ца журалийсса дур, му билаятрал цIаницIун бавхIуну дакIнийн бичлан бикIай конкистадортал, коррида, ццах цирив къакIулсса тореадортал, гьаваслансса къавтIавуртту ва гитаристътал, вай цимурцаннул ялувгу – Мигель Сервантеслул щаллу дурсса пашмансса сипатрал рыцарь Дон Кихот ва мунал тачIав аьраттал къауккайсса ххуллулсса Санчо Панса. Цал унугу тиккусса фольклорданул фестиваллавух гьуртту хьуманан тIитIайссар испаннал халкьуннал культуралул ва искусствалул караматсса дуниял, — буслай бур ва фестивальданийн лавгсса Республикалул Халкьуннал творчествалул къатлул информациялул отделданул хъунмур ХIабибат Закуева.
Испанналми къавтIавурттаяр къамахъунну жуллами къавтIавурттугу диркIун дур, лезгинкалухухгу лавгун бивкIун бур чил билаятрал инсантал ва хъамал. Фестиваллу наниссаксса хIаллай дагъусттанлувтурал ва чил билаятирттал къавтIалтрал буллай бивкIссар кувннал кувннансса мастер-классру. Гьамин, ккавкказуллал лезгинка, испаннал сарабанда, португалнал фолия ва чIярусса цаймигу, жунна уттинин бавсса ва къабавсса цIардащалсса, дунияллул халкьуннал къавтIавуртту Испаннал ссавнилу ца майдандалий ккаккан дурссар.
Ца хъин аьдатну хьуну дур цинявппагу творчествалул группардал оьрмулул бугьараминнансса пансионатирттаву ва къатраву ихIсандалул концертру ккаккан дуллалавугу.
Чил билаятирттал тамашачитурал дакIурдиву Дагъусттаннал вакилтурал хIасул бувссар жула зунттал билаятрал халкьуннал культуралиясса ва багьу-бизулиясса яла ххуйми, яла чаннами пикрирду.
ХIадур бувссар
Бадрижамал Аьлиевал
