Дагъусттаннал ФСИН-лул управлениялий ва мунил биялдарайсса идарарттай хьунни терроризмалущалсса талатаврил цашиврул кьинилун хас дурсса мероприятияртту.

А. Аьбдуллаева
[dropcap]Ш[/dropcap]икку гьуртту хьунни Ростовуллал областьрал ГУФСИН-лул хъунама, виваллил къуллугърал генерал-майор Муслим Даххаев, республикалул УИС-рал ветерантал, къуллугърал бурж биттур буллай оьрмурдацIа хьуминнал гъан-маччами, мукунма ОНК-лул вакилтал.

Управлениялул хъунаманан кIанайсса виваллил къуллугърал полковник Аьликьади МахIаммадовлул бувсунни Аьрасатнал тарихравун лухIи кьинину дурхсса 3-сса сентябрьданул кьинилия.
— Жула къуллугъ тачIавгу бигьасса, паракьатсса къабивкIссар. ЦIанасса чIумаллив му кIилий захIмат хьуну бур, УФСИН-лул зузалт хIакьинугу тахсиркаршивурттащалсса талатавриву хьхьичI хху­ттай буссар. Жунна ххирану дацIлай дур Дагъусттаннал аьрщарайсса паракьатшиву.
Тахсиркаршивурттащал талай жанну харж дурсса къучагътал жунма мудангу дакIний бикIантIиссар, — увкунни Аьликьади МахIаммадовлул.

Муслим Даххаевлул дакIнийн бивчунни Бесланнай ва Буденовс­калий, Дубровкалийсса театрданул центр бувгьусса чIумал, Москавлив, Каспийскалий, Буйнакскалий ва Волгодонскалий оьрмурдацIа хьуми.
Ахирданий, къуллугърал бурж биттур буллай жанну дуллуминнал гьайкалданучIа дирхьунни тIутIив.