Зул пиша яла бусравмурди

[dropcap]В[/dropcap]ай гьантрай Дагъус­тта­ннал виваллил ишир­ттал министр Аьвдурашид Ма­хIаммадовлул шадлугърал даражалий къуллугърал удостоверенияртту буллунни Аьрасатнал МВД-лул вузру къуртал бувну, республикалул Виваллил иширттал министерствалий зун бувкIсса жагьилсса пишакартурахьхьун.


Андриана Аьбдуллаева
[dropcap]М[/dropcap]ажлисрай гьуртту хьунни Зузалтращалсса давриха зузисса управлениялул хъунама, виваллил къуллугърал полковник Сахават Сахаватов, Миг­рациялул масъаларттаха зузисса управлениялул хъунама МахIаммад МахIаммадов, выпускникнал нину, къуллугърал бурж биттур буллай жан дуллу­сса зузалал щащар Раисат Исяева.

ХIаписартурал чиннугу ларсун, республикалул МВД-лул системалий зун бувкIсса пишакартураву бур Аьрасатнал МВД-лул Волгоградуллал академия, Ростовуллал, Нижегородуллал ва Сибирнал юридический институтру, Краснодардал ва Санкт-Петербургуллал университетру къуртал бувсса жагьилтал. Вай зунтIиссар цивппа дук­лан гьан бувну бивкIсса районнай ва шагьрурдай.

Пишакартурахь даврил дайдихьу барча дуллали­сса их­тилат бунни Аьвдурашид МахIаммадовлул.
— Полициялул зузалал пиша – му хъинну бусравсса, сий ду­сса пишари. Жула республикалий шанма миллиондалия ливчу­сса инсантал ялапар хъанай бур. Миннал гьарцаннал паракьатшиву, мюхчаншиву зуйнни хъар хъанахъисса. Зу гьарца шаттираву закондалийн мютIину, зуйра ххишаласса жаваблувшинна душиву кIулну бикIан аьркинссару, зува язи бувгьусса пишалий дакI марцIну зун аьркинссару. Зу чIявуминнал буттахъал пиша язи бугьаврий жу рязиссару, — увкунни министрнал.
Ва кьини министрнал канища удостоверенияртту лавсъсса 30-нния ливчусса пишакартураву ца хъамитайпагу бия.