Занай бур Дагъусттаннал шагьрурдал ва районнал дуклаки оьрчIан ва студентътуран дяъвилул, ватан ххирашиврул темалийн багьлагьисса спектакллу ккаккан бан. Цавагу шагьру къаливчIхьунссар «АхIмад-хан Султан» ва Апанни Къапиевлул аьрали чичрурду гьануну ларсъсса «Духкъалагайсса макь» тIисса спектакллу ккаккан къабувсса.
Учин бюхъанссар, вай спектакллу сававну, ххи хьуссар дуклаки оьрчIан Совет Союзрал КIийла Виричу АхIмад-хан Султаннуясса кIулшивуртту, кIул хьуссар Апанни Къапиевлул бюххансса мукъущал куну.
Вай гьантрай «Духкъалагайсса макь» ккаккан бунни Дагъусттаннал паччахIлугърал политехнический колледжрал студентътуран.
Спектакль байбишин хьхьичI театрданул завлит Гулизар Султановал бувсунни ва кьини хIасул дан багьана хьусса Бесланнал оьзрулия, Аьрасатнал ва Дагъусттаннал шагьрурдай хьусса оьсса терактирдая, 1999 шинал жула аьрщарайн ярагъуннил далгусса кьюкьри ххярххун, Дагъусттаннал шанна райондалий хьусса дяъвилул иширттая.
Хъунмасса гъирарай вичIи дирхьуну бия студентътал дяъвилул хIасратрая бусласисса спектакльданух. Мунивасса лахIзарду ласлай бия телефоннайн. Кувннаха кув кьюлтIну лихьлай бия макь. Ва бакъарив чичул пасихIсса мукъул бияла?!
Акциялий гьуртту хьусса МахIачкъала шагьрулул терроризмалийн къаршисса комиссиялул член Бадруттин МахIаммадовлул барчаллагь увкунни театрданул коллективрахь. «Яла дакI кьянкьама инсангума ва спектакльдания бивсса асардал хъювусул уккан къаувну къаитанссар», — увкунни ванал. Студентътурайн оьвчаву дурунни аьдатру, рувхIанийсса ххазина ва мяърипатрал кьараллу дуруччин.
