Сентябрьданул 21-22-нний «Каспий» санаториялий «EduWave» тIисса кIулшивуртту дулай индустриялул форум хьунтIиссар.
З. АьбдурахIманова
Форумрал даврия ва ванийнсса умудирттая бусласисса пресс-конференция хьунни сентябрьданул 19-нний «Дагестан» РИА-лул пресс-центрданий. Ваний гьуртту хьунни МахIачкъала шагьрулул бакIчинал хъиривчу Запир Алхасов, Москавуллал «Атлас Коммуникаций» тIисса проектрал хъунмур Татьяна Раитина, МахIачкъалаллал пишардал даража лахъ бай центрданул каялувчи МахIаммад Абакаров ва Дагъусттаннал Педагогтурал ассоциациялул хъунмур Анжела Байранбекова.
Татьяна Раитинал бусаврийну, форумрал даврия хъунмасса хайр биянтIий бусса бур паччахIлугърал ва цивппа заллусса школарттал каялувчитуран ва мукунма ялунсса кIулшивуртту дулай центрдал пишакартурангу.
«Мадарасса шиннур жул педагогтурал ва кIулшивуртту дулай идарарттал каялувчитурал сянатирттал даража лахъ бавриха зий. Ва форумрайнгу жу ларсун бувкIру билаятрайх цIа ларгсса ялунсса кIулшивуртту дулайсса центрдай ишла дуллалисса личIи-личIисса программартту», — куна ванил.
Форумрай гьуртту хьунтIий бур СКФО-лул сайки циняр республикарттаясса делегацияртту ва Москавлиясса цаппара ялунсса кIулшивуртту дулай центрдал каялувчитал.
МахIачкъалаллал пишардал даража лахъ бай центрданул хъунама МахIаммад Абакаровлул бусаврийну, жулла республикалул кIулшивуртту дулай идарарттал чIявуми каялувчитал цала школарттай уттизаманнул программартту ишла дан къабюхълахъисса, ми щурущи дуваврих хъуннасса къулагъас дан къаччисса бусса бур.
«Форумрай гьуртту хьун жу оьвчарду чIявусса школарттал хъуниминнайн. Уттизаманнул школарттай цIусса программарттал хъирив лаян анавар къабуклакаву – му жула оьрчIах къулагъас дакъашивур», — увкунни М. Абакаровлул.
Ванал бусаврийну, цайми регионная бувкIсса педагогтурал цала уртакьтурахь бусантIиссар цачIава уттизаманнул программарттащал цукун зий буссарив, дулунтIиссар миннал суаллахьхьунсса жавабру. Теориялул даву дакъасса, жула педагогтуран хIадур дурну дуссар практикалулмур давугу.
