ЦIу буккан буллай бур аэропорт

Август зурул 14-нний МахIачкъалалив ДР-лул ХIукуматрал председатель Артем Здуновлул каялувшиндаралу хьунни МахIачкъалаллал аэропортрал лагма-ялттусса аьрщи ишла даврил тагьарданун хас дурсса батIаву.


Имара Саидова
Шикку гьуртту хьунни ДР-лул вице-премьер, аьрщарал ва имуществалул иширттал­сса буллалисса министр Екатерина Толстикова, ХIукуматрал председательнал хъиривчунал бигарду биттур буллалисса ХIажимахIаммад ХIусайнов, ДР-лул шяраваллил хозяйствалул министр Абумуслим Абумуслимов, Къарабудахккантуллал райондалул бакIчи МахIмуд Амир­аьлиев ва МахIачкъалаллал аэропортрал директор Арсен Пир­махIаммадов.

Артем Здуновлул кIицI лавгунни МахIачкъалаллал аэропортрай, пассажиртуран къулайсса куццуйсса цIусса терминаллугу бувну, самолетру ли­ккайсса полоса гьарта-гьарза дан багьлай бушиву.
Арсен ПирмахIаммадовлул ккаккан дунни махъсса ппур­ттуву аэропортрай хьусса дахханашивуртту.
— Аэропорт цIу буккан бувну махъ самолетру ликкайсса полосалул лагру дур PCN-42 коэффициентрал ва 2640 мет­ра дусса.

Мунийн бувну дайшишру хъанай дур хъунисса самолетру кьамул даврин. Гихунмайгу аэропортрал самолетру ликкайсса полоса хъунма баншиврул аьркинну дур аэропортрал лагма-ялттусса аьрщи ишла дан, — увкунни Арсен ПирмахIаммадовлул.
Ванал мукунма бувсунни Ираннал, Китайнал ва цаймигу билаятирттая самолетру кьамул даву тIалав буллалисса документру букIлай бушиву.
Аэропорт цIу буккан баврил давурттавух Арсен Пирма­хIаммадовлул кIицI лавгунни Аьрасатнавун ва чил билаятир­ттайн кьай-кьуй анаварну диян дулланшиврул кьайлул терминал бан ва ми чIумуйну ядувайсса камерартту бан багьлай бушиву.
Артем Здуновлул аэропорт­рал каялувчитурая тIалав бунни аэропорт гьарта-гьарза буллалийни ишла дансса аьрщарал ккал даву.