ДР-лул Культуралул министерствалий хьунни «Аьрасат – ттул тарих» тIисса музейрал – тарихийсса паркрал даврин хас дурсса батIаву. Му дачин дурну бия ДР-лул культуралул министрнал буржру чIумуйну биттур буллалисса Зарема Буттаева.

 

Бадрижамал Аьлиева
[dropcap]Б[/dropcap]атIавривух гьуртту хьунни музейрал директор Азнаур Аджиев, ДР-лул Чичултрал союзрал председатель Ма­хIаммад АхIмадов, ДР-лул Художниктурал союзрал председатель Кьурбан­аьли МахIаммадов ва цаймигу.

— Республикалул каялувшиндарал бувсса хIукмулийн бувну, музейрал къат­ри цалсса личIлачIиссар ДР-лул Строительствалул министерствалул биялдарай. Амма дуллалисса личIи-личIисса батIавуртту, учиннуча, конференцияр­тту, коллегияртту, выставкартту, презентацияртту, творчествалул вечерду, дикIантIиссар Культуралул министерствалухь.

[dropcap]М[/dropcap]узейрал гьарта-гьарзасса къат­равурив ччимур батIаву лавайсса даражалий дуван бюхълай бур, — увкунни Зарема Буттаевал.
Министрнал бувчIин бунни ва проект щаллу дуршиву АьФ-лул Президентнал лагрулий ва билаятрал бакI дургьуминнал чулухасса ванихсса къулагъас ва ургъил хъинну лахъсса бушиву, цIусса директор ивтун махъ музейрал даврил бущи цалнияр цал анавар буклай бушиву.

Азнаур Аджиевлул цалвамур ихтилатраву кIицI лавгунни цив хIадурну бушиву музейрал къатраву ччимур батIаву дуван, дуллалимунил чIарав бацIан, музейрал аьрщарай душиву мюнпатну ишла къадуллалисса къатригу, мигу ишакаш дуллан аьркиншиву.

Музейрал къатрал дур 13 азарда кв.м. майдандалул. Аьрасатнал авадан­сса тарих ккаккан буллай бур уттизаманнул технологияртту ишла дурну: видеочIиртту, панорамалул кинотеатрду, 3D-реконструкцияртту, голографиялул инсталляцияртту. Шикку дурну дур региондалул выставка: ДНЦ РАН-далул Тарихрал, археологиялул ва этнографиялул институтрал ва ПаччахIлугърал Архиврал кумаграйну щаллу дурсса 16 стендрай.

БатIаврий хьусса ихтилатирттаву чIурчIав дуллай бия проектравух шайссаксса чIявусса жагьилтал хIала бизан буллан аьркиншиврий.