Июль зурул 6-нния 10-ннийн бияннин УзбакIнал республикалий, Бухара шагьрулий, хьунни Дянивмур Азиянал ва Къазахъисттаннал хIукуматирттал магьирлугърал «Бухзаманнул Бухаралул чIалъаьрдачIа» тIисса Дунияллул халкьунал дянивсса искусствалул фестиваль.

Имара Саидова
[dropcap]Ф[/dropcap]естиваль дуллай бия Аьрасатнаву баян бувсса Тархъансса паччахIлугъирттал дусшиву дуруччаврил шинан хасну. Ши­кку гьуртту хьунни хьхьичIавасса СССР-данул республикарттая­сса культуралул ва искусствалул аралуву хъунмасса захIмат бивхьусса пишакартал.

Жула республикалул чулуха фестивальданий гьуртту хьунни Дагъусттаннал Музыкантътурал союзрал правлениялул председатель Хан Баширов.
Фестивальданул сакиншиндарал комитетрал член, Бухардал музыкалул школалул директор Гюльчехра Норовал мархри Дагъусттаннаясса бур, ванил нину дур лазгири хъамитайпа, ппу – УзбакIнавасса.

[dropcap]Ф[/dropcap]естивальданий гьуртту хъанахъиминнахь Х. Башировлул хъинну асар хьунну бувсунни зунттал билаятрал культуралия. Ванал кIицI лавгунни Дагъусттан цила авадансса культуралул тарихращал тачIавгу Аьрасатная ят къабувцшиву. Яла ванал
цинявппа хIайран бунни Дагъусттаннал композитортурал ва узбакIнал Багьадур Исматовлул, Хайри Изамовлул произведенияртту щаллу баврийну.

Ахирданий ванал хъамаллуран пиш-каш бунни луттирду, да­гъусттаннал автортурал нотарду ва цува гьуртту хьусса кинордал дискру.
Фестивальданул сакиншинначитурал барчаллагь увкунни цинявппагу гьурттучитурахь ва кIицI лавгунни укунсса мероприятиярттайну миллатирттал дянивсса дусшиву хъиннура цIакь хъанахъишиву. Гюльчехра Норовал барча дунни уссурвалшиврийсса Дагъусттаннал Музыкантътурал союзран 60 шин шаврил юбилей.