[dropcap]И[/dropcap]юльданул 30-нний нюжмардий цал ДР-лул БакIчинал кIанайма Владимир Васильевлул каялувшиврий шайсса батIаврий ххал диргьунни Дагъусттаннал социал-экономикалул лябуккулул хIасиллу.

[dropcap]Б[/dropcap]атIаврий хъунмур махъ лавхъунни республикалул экономикалул ва территориярттал лябуккулул министр ХIусман Хасбулатовлул. Мунал бусаврийну, гьашину Дагъусттаннал аьмсса (консолидированный) бюджетравун дучIан дурну дур 17,1 млрд. къуруш налогирттал, ми хъанай дур пландалий ккаккан дурминнул 102, 6 процент. Республикалул инвестициярттал программалул лагрулий гьашину бан тIий бур 10 школа, ца азархана, ца культуралул къатта, 4 спортзал, 6 щинал щаллу байсса объект ва цаймигу. Ми бан итадаркьуну дур 3,8 млрд. къурушрал Гьашину шяраваллил хозяйстварттал ларсун дур 52 техника 52,6 млн. къурушрансса.

Статистикалул ккаккиярттайн бувну, хъин чулийсса дахханашивуртту хьуну дур шяраваллил хозяйствалий (101,3%), агьалинан багьлухсса хIаллихшинну давриву (101,2%), арцуйнусса доходру дучIаврил чулуха (100,5%).
Мунищала архIал давурттал бущи ялавай багьну бур строительствалул давурттаву – 87,9%, агьалинансса къатри даврил иширттаву 82,7%, машлул иширттаву – 97,5% ва промышленностьраву – 96,1%.
Ми ведомстварттал каялувчитурал бувсунни давурттал бущи ялавай багьаврил сававирттая.

БатIаврий ихтилат хьунни мукунма агьали зузи кIанттурдал дузал баврил масъаларттаятугу, агьалинал доходирттал хIакъиравугу.
Республикалул БакIчинал кIанайманал бусаврийну, властьрал органнал цалла давурттаву чул бищун аьркинссар так тIайласса информациярттайн, цанчирча, мунин лавхьхьуну зурча, давуртту тIайлану дузрайн дуклантIиссар.

ХIадур бувссар
ХI. Аьдиловлул