ДачIи шинал лажиндарай дурну дур 624 ххал бигьаву миннувату 463 диркIссар пландалий ккаккан дурми, 161 – пландалий дакъами. Ялун личин дурну дур 567 диялдакъашиву, чивчуну бур 548 протокол, духлаган дан аьркиншиврул чIунгу ккаккан дурну.
ДачIи шинал мутталий аьмну дирхьуну дур 3 млн. ва 112 азарда къурушрал аьчIа. ДукIу вара чIумал дирхьуну диркIссар 1 млн. ва 986 азарда къурушрал аьчIа.
Управлениялул ххал диргьуну дур 186 азарда гектар шяраваллил хозяйствалул ххяххияртту дугьайсса аьрщарал. Миннул хIасиллу пашмансса хьуну дур: 14 ишираву дугьайсса хъуруннал аьрщив чапал хьуну ляркъуну дур. Ххал диргьусса аьрщарай ашкара бувну бур ихтияр дакъанна ишла дуллалисса 5 карьер ва цIинцI-ччюрк дичайсса 1 бакIу.
Управлениялул духлаган дан бувну бур 600 гектар аьрщарайсса диялдакъашивуртту. Дугьлагьи бувну бур хьхьичIра ишла къадуллай бивкIсса 505 гектар аьрщарал.
Фитосанитар надзорданул карантиндалул бутIуй ххал диргьуну дур 220 азарда гектар аьрщарал ва 10 гектар теплицардал. Миннувасса 800 гектарданий карантиндалул зона букьан бувссар, азарду къаляркъуну тIий.
Мукуннасса диялдакъашивуртту ляркъуну дур ветеринариялул бутIуйгу.
ХIадур бувссар
ХI. Аьдиловлул
