Щардал жяматрал цала каширдацIух бувсса ттуплий буккай арена тIитIлай

Щардал шяраву хьунни, так ца райондалий бакъа­сса, щала республикалул оьрмулуву хъинну ккалли бансса иш – хъуннасса шадлугърай тIивтIунни жяматрал цала каширдацIух бувсса цила бикIайкунсса ттуплий буккай арена.Му иширацIун бавхIуну, барчаллагьрай чIявучил итталун багьсса фондрал давриятуссар хIакьинусса Щардал шяраваллил бакIчи Мирослав Ибрагьимовлущалсса жул ихтилатгу.

---

— Мирослав, махъсса шиннардий хъинну захIматну бур шяраваллил бакIчинал къуллугърай зузиминнан. Билаятрайсса кризисрацIун бавхIуну, ссуссукьу буллай бур кIанттул бюджет. Лахъ дуллай бур налогру. Ми ишругу хIисав бувну, цайми кIанттурдах бурувгун учин бюхъанссар зул шяраваллил ишру оьккину най бакъар куну.
— Буттал кIанттуцIунгу, ни­ттил мазрацIунгур жула мархри бавхIусса. Жула миллат дунияллийх кIама бивщуну бур. Тти вай ший ялапар хъана­хъимивагу миха-тиха къабищуншиврул, миха-тиха бивщумигу, чIун ляхну бухьурчагу, буттал миналийнмай бучIаваншиврул, цува-цанналгу дакI ватандалийн кIункIу дансса шартIру сакин дан бюхъаву – му хъунма­сса талихIри. Муна му ниятрай бухьунссару жу хIакьину жула ишру бачин бан хIарачатрайгу.
Жу сакин дурсса фондгу мура мурадрайссар. Фондрал агьаммур даву «Щара-Арена» хьуну биявхьур, айишинна муния. Ххюва миллион так арцуйну харж хьунни ва даврин. Му бакъасса, дургьусса техника, мунин харж дурсса ччуччия, инсантурал бувсса захIматгу хIисав барча, ацIния кIивахъул миллиондалунсса даву дурну дур жул жяматрал. Арцуйну кумаг къабувминналгу хъуннасса гьурттушинна дурссар даврийну, иширайну, маслихIатрайну. Амма ва арена баврил ялувгу буссар кIибивщусса пикрирду. Бур му щин аьркинссар, му буканнив, хIачIаннив тIутIисса. Буниялттунгу, гьарца кьини гикку ттуплий буклансса жагьилтал я шяраву бакъар, я шагьрулия къабукIлантIиссар. Харж дур­сса арцул дачIирагу зана хьун тIийгу дакъар. Хъус лякъин­сса мурадрай бугу-къабувссар. Миксса арцух бюхъанссия ца ишбажаранчинал нагьлил ягу дикIул цех буван. Амма так ца арцуйну яхьунгу бюхълай ба­къар. ХьхьичIва-хьхьичI жун ччай бия жагьилтал шяравун кIункIу бансса шартIру дузал дан, миннал оьннасса чIун мюнпатну харж даврил ялув пикри бан. Шинай ца зуруйсса ишлану бикIарчагума ва майдан – мугу биялсса мурадри. Так ца спортрах къулагъас дуну, вайми иширттал чIарах буклайгу ба­къассару. Бюхъайкун культуралул чIаравгу бацIлай буссару.
Клубрал ва администрациялул къатрал магъив, нузру, чIавахьултту цIу бувссар. Райондалул администрациялул 160 азарда къуруш итадаркьуна ми иширттан. Миннухгу анжагъ магъи дишин хьуна. Диял къа­хъанахъимур жяматрал дартIун, арамтал зун бувккун, дурссар давуртту. ЦIарая мюхчан хьунсса шартIру дузал дурссар. Клубран лавсъссар сайки шанттуршазарда къурушрансса аппаратура, плазменный телевизор, жагьилтал цачIун бавтIсса чIумал кино ххал давансса проектор. Дишарду спутникрал антенна. ХIасил, буллай буру бан шаймургу, ца ххишалагу.

— Фондру хьуннав, ккуранну хьуннав, ми ца гьавасрай сакингу дурну, чIун чIарах дурккукун, миннул даву дяличIай. Зул жагьилтурал фонд тIурча, шиная шинайн тIутIайх дичлай душиву ххари хьунсса иш бур.
— Фонд куну, официалну сияхIрайн ларсъсса фонд да­къассар. Ва хъунмурчIин хъанай дур вихшалдарал фонд. Ванил бакI дургьусса инсанталгу бу­ссар. ТIивтIуну дуссар банкрал карточка. Интернетраву буссар группа, мяйцIалунния ливчусса инсантал гьурттусса. Гьарца дуллалисса даврил план, дурмунил хIасиллу га группалуву дишай­ссар. Щил циксса арцу дирчуссарив, чун циксса харж хьуссаривгу гьарцаннан чIалачIиссар.
Амма жул фондрал агьаммур мурад, анжагъ арцу ратIаву бакъарча, жямат цачIун бавур. Цанчирча, вайми щархъаву кунма, жулмур жяматгу буссия СПК-лул, аьрщарал, колхозрал цIанийсса бувчIу-къабувчIурду сававну, кIибивщуну. ТалихIран, жяматраву аькьилшивугу, ссавургу ялтту дурккун, кувннан кув бувчIунни.
ХIатта на увчIлачIисса чIумал ттуйн къаршину бивкIсса инсанталгума ттул лагма лавгунни. Жямат чIарав къабавцIуссания, вайксса давуртту шяраву дангу къахьунссия. Сайки гьарца ххуллункьини бувкIун, шагьрурдай­сса жагьилтурал щин, ххуллурду бакьин буллай, субботникру дуллай буссар. Му жул бурж бакъар, паччахIлугърал дувача, райондалул дувача къакуну, гьарца ишираву чIарав бацIлай бур. Бувцу­ссар хьхьувайсса чани.
ХъатIи буллансса кIану личIи бувну, гикку дишинсса 50 метралул лахъисса, 12 метралул утта­сса магъи дуссар машан ларсун, ратIин хIадурну. Столлугу ги­ккува батIинтIиссар. Инсантурал оьвчаву дур хIатталлив бивкIу буччаврил къатта бан­сса, му давугу цала бакIрайн ласлай бур. Бярнил ккурккай чапар дуллай буру. Вай арулла шинал мутталий шяраву дан бювхъусса давурттахлу Аллагьнайнгу щук­рулий, жяматрайнгу барчаллагьрай ура.

— Мирослав, мяйжаннугу хIакьину Щардал жямат­рал бавкьуну дуллалимур ччима мяш хьунсса дур. Зул жагьилтурацIух бивзун, вана хIакьину цайми щархъал жагьилталгу бувккунни, мукун­сса фондругу сакин дурну, цала гужирдацIух жяматран мюнпатну щуруй: Буршиял, Ххюлуссуннал, КIувурдал, ЧIарттал, Шахьуйннал…
— Жу муния ххариссару. Гьарцаннан тIайлабацIугу чIа тIиссару, чIарав бацIангу хIа­дурссару.

— «Ттуршва школа» программалувун багьан мува фондрал кумаг буврив?
— Школалун кумаг бансса инсанталгу бувккунни ца кьинилул дянив. Шагьрурдай­сса ишбажаранчитурал цайнма лавсунни. Шяраву школа ябан багьлай бур, оьрчIру чансса бухьурчагу. Школа бакъасса шяраву оьрмулул тарг лешлай бур. Чан­сса бухьурчагу, микку зунсса кIанттурдугу бур. Школалулли ва шярава бувксса хьхьичIунсса инсантал тарбия бувсса. Шяраву увагу ца оьрчI ухьурчагума, ганалгу кIулшиву ласуншиврул, паччахIлугърал кумаг къабарча, жува, жяматрал, бан аьркинссар.

— Шяраваллаву захIмат­сса ишну бур налогру ратIин къабюхълахъаву. Сайки гьарцагу батIаврий райондалул бакIчинал му суал сукку бай. Мукунсса шяраваллал сияхIравугу зул шяравалу къадикIай. Му иширал ци кьюлтIшиву дуссар?
— Хъуниссагу дакъар ми налогру. Мунил захIматшиву паччахIлугърачIа бувчIу-къабувчIулувугу дур. Инсаннал цала дакI тIайлану дулурча дакъа, къадуллалиманангу шяраваллил хъунаманаща цичIав бан хъанай бакъар. ПаччахIлугърал жухьхьун мукунсса ихтияргу дуллуну да­къар, я зехлан, я аьчIа дихьлан, я танмихI кьукьлан. Маз-кьаз бишин багьлай бур. Миккугу хъунмур иш жяматрал бакIчинал тIайлашивруву бур.

Ибрагьимов Мирослав Ибрагьимлул арс увну ур 1977 шинал Щардал шяраву. Дагъусттаннал паччахIлугърал университет къуртал бувну махъ, МахIачкъалалив цала ниттиуссил каялувшиндаралусса строительный компаниялий зий шин ва дачIигу дурну, буттал шяравунай зана хьуну, зун увххун ур райондалул виваллил иширттал отделданийн. Миччагу лавгун ур школалийн дарсру дихьлан. 2011 шинал жяматрал увчIуну, зий ур шяраваллил администрациялул бакIчину.

Цалла дуллалисса налогру чун наниссарив халкьуннан чIалай духьурча, жяматралгу налог къадулунну къаучинтIиссар. Аьрщарал налог ратIин захIматну бур, СПК-рдал цалий къабацIаву сававну. Ца-ца шяраву ми СПК-рду кIи-кIира дур. Шяраваллил ва СПК-лул хъуними кувннащал кув бакъакьлай, аьрщив дачIин къабюхълахъисса кIанттурду бур. Жул шяраву мукунсса буруккинтту бакъар. СПК-лия жяматран биялсса хайргу бур, аьркинсса иширттан дикI, нис, нагь дулай. Хъурдуккаврил байран цIу лаган дурссия, нава ва къуллугърай зун увкIсса чIумал, ттуятура дайдирхьуну. Утти гьарца шинал дуллалиссар му байран. СПК-лул биххан ризкьи булай­ссар. Субботникрайн биххангу хIайван булай. Фондравун взнос дулай, клубрал ремонтгу щалла СПК-лулли дурсса. Трансформатор ччувччуну, 40 азарда къурушран бакьин бунни цала. КIива комбайн бия къазузисса. Гай бавххуну, ххулув буцайсса чIиви машина жяматран буллунни. Школалун дукра дан, ший ттизайсса ризкьи бакъахьувкун, накI ласунсса арцу СПК-лул дулайссар. Аьрщарал налогру цала чIумал дулай. СПК-лул давривугу чаннашиву дуссар.

— Ина архIала школалийгу зий ура, обществознаниялул дарсру дихьлай. КIира жаваблувсса даву цаннихун ца дахчилай, захIматшиву дакъарив?
— Даву дакIнил ларсъсса духьурча, цумацагу инсан гания укъаххайссар. Милицанал даву, масалдаран, ттул дакIнил ларсъсса даву дакъая. Мунияту захIмат хъанай бия. Хъунама лейтенантнал чиндалуву на га даву кьариртссия.
Учительнал пиша дакIнин кьамулсса бур. Дарсру чIярусса дакъар, анжагъ кIива классраву дарс дихьлай ура. Ттула агьаммур даву жяматращал зузисса духьувкун, жагьилтуращал зузаврия ттун хъунмасса кумаг бур.

— Цими тIюва дур хIа­кьину Щардал шяраву?
— Жул тамансса тIюварду дур Ухссавнил шагьрурдай зий, гъинттул бигьалаган букI­лакIиссаннал. Мудан яхъана­хъисса духьунссар 70 тIюва. Амма шяравалу гьантта бувккуну цIулаглай дур, къатри буллалими чIяву хъанай бур. Мунил жул дакIурдиву умуд бихьлай бур, та-бухьурчагу, жямат кIура баянхьуви шяравунмай тIисса.

— Барчаллагь, Мирослав, аьчухсса ихтилатрахлу. Чулийн букканнав вил дакIнийсса циняв мурадру.

Ихтилат бувссар
Зулайхат Тахакьаевал