Апанни Къапиевлул цIанийсса Лакрал музыкалул ва драмалул театрданул артистал июнь зуруя шинмай занай бур Лак­рал щархъайх гастроллай.

Зулайхат Тахакьаева
Цалчинсса гастроллай Ккуллал райондалул щархъай ккаккан був­ссар музыкалул къямадия «Гъази-Гъумучиял серенада» (Казбек Мазаев). Лакрал райондалий – концертрал программа «Чагъанттул чIурду».

КIилчинсса гастроллай Ккуллал райондалий ккаккан дурунни концертрал программа. Лакрал райондалий – Ж. Мольердул «Кьякьлухун ивхьусса лас».
Ва нюжмардий Лакрал театрданул артистал лавгунни Буйнакскаллал райондалийсса «Орленок» лагерьданий бигьалаглагисса оьрчIан мастер-класс ккаккан бан.
Театрданул хъунама режиссер Аслан МахIаммадовлул оьрчIахь бувсунни актернал пишалия, жула республикалий зузисса театрдая ва Дагъусттаннал цIанихсса актертурая.
ОьрчIащал дурунни личI­лулшиву ххишала хьун дансса тренингру, тIуркIулийнусса упражненияртту. Актертуращал оьрчIру вардиш хъанай бия жанавартрал чIурду хIасул бан, такьва даххана дурну, шеърирду буккин.

Лагерьданул директор Заур Шабановлул кIицI лавгунни укунсса мастер-класс баврийну оьрчIаву ххи хьушиву театрал магьирлугърахсса ва актернал пишалухсса гъира.
Мероприятие хьуссар ДР-лул ХIукуматрал хъунама Артем Здуновлул ва Культуралул министерствалул ОьрчIал лагерьдай магьирлугърал ишккаккултрал мастер-классру сакин буллансса тIалавшиндарайн бувну.