Дахадаевуллал райондалий вай гьантрай къуртал хьунни 3-4 кьини най бивкIсса Регионнал дянивсса жагьилтурал экологиялул ва туризмалул «Кубачи – 2018» тIисса форум. Шамилчин хъанахъисса форумравух гьуртту хьунни жулла республикалул ларайсса дуккаврил идарарттаясса ва Ухссавнил Ккавкказуллал цаппарасса регионнаясса жагьилтал.
Бадрижамал Аьлиева
[dropcap]Ф[/dropcap]орум тIитIлатIисса шадлугърай гьуртту хьунни Дахадаевуллал райондалул бакI дургьуми, ДГУ-лул профкомрал председатель НухIкьади Рамазанов, Коррупциялийн ва терроризмалийн къарши бацIаврил АьФ-лул СКФО-райсса хъунмур управлениялул начальник Луиза Сулайманова, Аьрасатнал «Ххувшаврил волонтертал» тIисса цIанилусса хъунмур штабрал директор, ДР-лул Жагьилтурал иширттал министерствалул зузала МахIаммад ХIусайханов.
Цала аьрщарай бавтIминнахь ча бувкру тIисса ихтилат бунни Дахадаевуллал райондалул бакIчи Жаруллагь Оьмаровлул. Форум тIитIлатIисса официал бутIа къуртал хьуну махъ цинявнналагу гъирарай ххал дунни концерт.
[dropcap]Ф[/dropcap]орумрал дия хъинну авадансса программа. Оьргърал ва УрчIарахъиял шяраваллал чIаравсса, ябацIансса тIабиаьтрал вив лавсъсса кIанттай, зунттал лахъний, марцIсса гьавалий хьусса форумрай жагьилтурал хъинну мюнпатну гьан бунни вай гьантри. Му даврил лагрулий хьунни личIи-личIисса мастер-классру, интерактив-ссятру, республикалий ва мунил кьатIув цIа ларгсса инсантуращалсса хьунабакьавуртту, Къара-Къурайшрайнсса ва Оьргърал шяравунсса экскурсияртту. Оьргърал шяраву жагьилтал бивунни школалул музейравун, цIа дурксса чичу АхIмад-Хан Абубакардул музейравун, гъирарай ххал бунни шяраваллил хьхьичIавамур махIла, тамаша бунни «Кьяцри» ва цаймигу персонажру гьурттусса оьргърал хъатIай ва гьаз хьунни лагмава бургайсса майданнив.
Гьарца кIюрххил жагьилтурал цалла кьини дайдишайва зарядкалийну, форумрал кIилчинмур кьини жагьилтуращалсса зарядка дунни грепплинграл дунияллул чемпион Шамил ХIасановлулгу. Гьарцагу кьини дайлитIайва дискотекалийну ва дусшиврул къавтIилул лагма батIаврийну.
Жагьилтурал гъирарай ххал дунни Кищиял, Оьргърал ва Хъярбащиял шяраваллал усттартурал карунних дурсса эмаратру.
«Кубачи – 2018» форумрая жагьилтал зана хьунни цIу-цIусса дусталгу бувну, ялуннингу шиккува хьунабакьинсса ниятрай.
