Базардаву низам дишин

ДР-лул ХIукуматрал председатель Артем Здуновлул каялувшиндаралу хьунни Дагъусттан Республикалийсса базардал давривусса диялдакъашивуртту духлаган даврин хас дурсса батIаву.

Артем Здуновлул дакIнийн бувтунни, базардал даврил хъирив лаяву ва машлул даву хьхьичIуннай даву мурадрай, сакин бувшиву хасъсса комиссия, цувгу тапшур бувсса Республикалул Предпринимательствалул ва инвестициярттал агентствалийн. Коми­ссиялувун бухлай бур МВД-гу, МЧС-гу, налогирттал къуллугъгу, Роспотребнадзор ва Россельхознадзоргу.

Республикалул базардавусса санитариялул ва эпидемиологиялул тагьардания, базардал лагма-ялттусса кIанттурду чапал буллалаврия ихтилат бунни ДР-лул тIабиаьтрал сурсатирттал ва экологиялул министрнал буржру чIумуйну биттур буллали­сса Набиюлла Къарачаевлул. Ванал бусласимунийн бувну, республикалул розницалул маша буллалисса базардал реестрданийн лавсъсса 25 базар хIисавну бур июльданул 1-мур кьинилийннин. Миннувату анжагъ 12-ннихь дусса дур зун­сса ихтияр, махъми зий бусса бур, закондалуцIун къабавкьуну.

Ветеринариялул комитетрал хIасиллайн бувну, Дагъпотребсоюзрайн мютIий шайсса 8 базаллуву (МахIачкъала, Хасавюрт, Къизлар, Избербаш, Буйнакск, Каспийск, Къизилюрт, Дарбант шагьрурдал) зий бусса бур Ветеринар-санитар экспертизалул комитетрал лабораторияртту. Вай цинявппагу базардал ялтту бувккун бур ДР-лул ТIабиаьтрал сурсатирттал ва экологиялул министерствалул ва цаймигу ведомстварттал ва кIанттул цилла каялувшиндарал органнал вакилтал. Набиюлла Къарачаевлул бусласимунийн бувну, яла-яла ццахханну дутлатисса тагьар дусса дур Хасавюрт шагьрулийсса Ярыксу неххал зумардачIах ва ялтту бивхьусса «Мустанг» ва «Гарант» базардавусса тагьар. Неххавусса щин гьаз хьурча, азарунния ливчусса машлул кIану бусса, гьантлун 3 азараксса инсан ияйсса базардаву хIасул хьун бю­хъай инсантурал оьрмурдан ва хъу­с­лин нигьачIаву дусса тагьар.

Ихтилатравух хIала бувхсса Роспотребнадзорданул Управлениялул ДР-лийсса каялувчи Элеонора Оьмариевал кIицI лавгунни ва базар зунсса ихтияр дакъанура зий бушиву. Миккува А. Здуновлул, къабагьавай буна, базар зий бивтсса кIанттул каялувчитурал даву дащуй дирхьунни.
Н. Къарачаевлул мукунма бувсунни Хасавюртуллал «Дагпотребсоюз» цIанилусса универсал базаллувумур тагьарданиягу. Миккугу бусса бур закон, низам зия дуллалисса кIанттурду.

Мунийн бувну А. Здуновлул увкунни:
— Дуки-хIачIия автозапчастир­ттал чIарав дахлахаву чун нанисса затри. Роспотребнадзорданул пишакартал уку-укунсса иширттал хъирив бавцIуну бикIан аьркин­ссар, — куну.
БатIаврий гьаз бунни базардавасса налогру дучIаврил масъалагу.
А. Здуновлул цалвамур ихтилат­раву кIицI лавгунни, ци базаллучIан гъан хьурчагу, цала ахъувасса, багъравасса ахънилсса, ахъулсса дахлахисса оьрмулул бугьарасса хъами ххал шайшиву, мукунсса чIумал инсантурах, миннал иш-тагьар дурчIлай, ца аякьа ххину буруглан аьркиншиву:
— Жунма чIалай бур кIичIирттаву маша буллалими. Бунугу, жува хъунив хьусса хъаннищал – бавахъащал талан къааьркинссару. Базардаву зун аьркинни чIярусса хъус думи, амма агьалинахьгу дикIан аьркин­ссар цалла ххяххан дурмур даххан­сса каши. Цимурца лакьин, амухъаяр ххув хьун – шикку чIявусса аькьлугу, гужгу къааьркинни. Амма къабучIиссар жулва инсантуращал укун къуццу буллан. Цайми регионну ва тагьарданува дурксса опытгу лалавсун, лугланну тIайласса ххуллурдах, — увкунни премьернал.

БатIаврий мукунма хьунни МахIачкъалаллал 2-мур базаллуву­сса диялдакъашивурттайн багьай­сса ихтилатругу. Мигу дур сайки циняв базардан аьмсса – санитар, ветеринар, цIу дагьан къаритаврил законодательствалийн дагьайсса диялдакъашивуртту, дуки-хIачIия багьу-бизулуву ишла дувайсса химиялул, промышленностьрал кьай-кьуйлущал цачIу ядуллалаву ва дахлахаву.

ХIадур бувссар
Бадрижамал Аьлиевал