Бакъасса зузалтрахлу – 74 миллион
Лаващиял райондалул бакIчинал ва мунал лагма лавгминнал кьаст лархIуну дур, закондалийн къабувну,
74 миллион арцул цалалуш буван.
Республикалул Силистталул комитетрал сукку дурсса уголов делолул лагрулий ялун личин бувну бур райондалул администрациялул бакIчинал, хъунама бухгалтернал, бухгалтернал ва кассирнал дурсса закон лиян даврил цIусса эпизодру. «Силистталул версиялийн бувну, 2013 ва 2016 шиннардий вайннал Федерал социал страхованиялул региондалул отделениялийн диян дурну дур кварталданий цал дувайсса, бувагу бакъасса, амма миннал отчетирттайн бувну, Лаващиял райондалул муниципал идарарттал зузалтруну хъанахъисса инсантурал хIакъиравусса отчетру. Къалпсса ккаккиярттайн бувну, Фондрал гьан дурсса арцу райондалул администрациялул кассалува цалла жипаву дихьлай бивкIун бур. Му схемалийн бувну, 74 миллион арцул лавсун бур вайннал», — буслай бур Комитетраву.
Щак тIимур тасттикь бувансса ягу инкар бувансса давуртту найнна дур.
Авария сававну
8 инсан оьрмулуцIа хьунни
Августрал 21-нний Дарбантуллал райондалийсса Геджух шяраваллил чулухуннайсса дуламанттуй кувннийн кув 3 машина щуну, усса кIанай 7 инсан къуртал хьуну ур, ца хъамитайпа – азарханалий. ОьрмулуцIа хьуминнавух 3 оьрчIгу ур.
Хьусса иширал хIакъираву уголов дело сукку дурну дур АьФ-лул УК-лул 264-мур статьялул («Ххуллийсса занакьулу хъанахъаврил ва транспорт ишла даврил кьараллу щаллу къадаву») 5-мур бутIуйн бувну.
ХIадур бувссар
Бадрижамал Аьлиевал
