[dropcap]А[/dropcap]вгуст зурул 22-нний МахIачкъалалив ДАССР-данул Верховный Советрал Президиумрал председательну зий ивкIсса цIанихсса политик АьбдурахIман Данияловлун 110 шинал юбилейрацIун дархIусса мероприятияртту хьунни.

Микку гьуртту хьунни Да­гъусттаннал цалчинма вице-премьер Анатолий Карибов, захIматрал ва социал ишир­тталсса буллалисса министр Расул Ибрагьимов, культуралул министрнал кIанттайсса Зарема Буттаева, спортрал министр МахIаммад МахIаммадов ва цаймигу къуллугъчитал.

Юбилейрал дайдихьу дурна Родопуллал бульварданий­сса политикнал гьайкалданучIа тIутIив дишаврийну. Анатолий Карибовлул, АьвдурахIман Данияловлул Дагъусттаннал агьалинал оьрму хьхьичIунмай буваву мурадрайсса захIматран ва бюхъу-гьунарданун лавай­сса кьиматгу бивщуну, махъ буллуна Дагъусттаннал Чичултрал союзрал хъунама МахIаммад АхIмадовлухьхьун. Ванал був­ккуна Данияловлун хас бувсса Расул ХIамзатовлул шеъри.

Гъан-маччанал цIанияту юбилейрайн бавтIцириннахь барчаллагь тIисса ихтилат бувна Данияловлул наслулиясса Улужат МахIаммадовал. Анатолий Карибовлул бувсуна юбилейрацIун дархIусса мероприятияртту гихуннайгу дикIантIишиву, выставкартту, конференцияртту дувансса ният душиву.

Делегация бивна А. Тахо-Годил цIанийсса Национал музейравун, АьвдурахIман Данияловлул кабинет ххал буван.