[dropcap]Л[/dropcap]аргсса нюжмар кьини Дагъусттаннал БакIчинал буржру чIумуйну биттур буллалисса Владимир Васильев гьуртту хьунни Дагъусттаннал прокуратуралул коллегиялул гьарта-гьарзасса мажлисрай. Шикку хIасиллу дунни ларгсса дачIи шинал мутталий ялув бацIай органнал закон ва низам дуруччаву цIакь даву мурадрай дурсса даврил.
Имара Саидова
Коллегиялий гьуртту хьунни Ухссавнил Ккавкказуллал федерал округрайсса АьФ-лул хъунама прокурорнал хъиривчу Иван Сыдорук, республикалул прокуратуралул, управлениярттал хъуниминнал, республикалул прокуратурардал отделлал хъиривчутал, шагьрурдал ва республикалул прокуратуралул кумагчитал ва ДР-лул Прокуратуралул аппаратрал зузалт.
ХIакьинусса кьини республикалий прокуратуралул къуллугъирттал низам цIакь даву ва даврил даража гьаз баву мурадрай дуллай буссар кадрардал дянивсса аттестация.
Прокуратуралул органнал аьлтту дунни бюджет тIайлану ишла къабуллалисса, муниципал ва паччахIлугърал аьркиншиннардал, ЖКХ-лул, градостроительствалул сферардавусса закондалуцIун къадаркьусса цикссагу тIайла дакъашивуртту. Прокуратуралул органнал дурсса силистталул чIалачIи бунни паччахIлугърал ва муниципал имущество низам зияну ишла дуллалисса кIанттурду, сияхIрайн лахъан дунни ацIвахъул миллионная лирчусса объектру, личIи-личIисса бюджетирттава 70-хъул миллион арцул доходирттал бучIан бунни паччахIлугърал бюджетравун.
ДР-лийсса УФСБ-лул, МВД-лул цачIуну дуллалисса чялишсса давурттайну кIанттул цила каялувшиндарал ва паччахIлугърал властьрал органнаву чIярусса арцурду тили-хъили дуллай бивкIсса кIанттурду ялун личин бунни, ашкара бунни Республикалул медициналул социал экспертизалул бюрорал зузалтрал, къалпсса инвалидтурал документру бавтIун, бюджетрава арцу дацлай бивкIсса кIанттурду. Мукунма ЦIуллу-сагъшиву дуруччаврил министерствалул, медициналул оборудование ва медикаментру ласунсса кьутIирду дурну, 7 миллиард арцунсса зараллу биян бувшиву. Ва иширал хIакъираву прокуратуралул сукку дурну дур УК РФ 178-мур статьялийн бувсса дело.
Му бакъассагу, кIицI лавгунни республикалул прокуратуралул давривугу хьунадакьлай душиву цаппарасса диялдакъашивуртту.
Владимир Васильевлул кIицI лавгунни дачIи шинал мутталий прокуратуралийн 53% агьалинал бувкIшиву ва мунийну чIалай бушиву халкьуннал прокуратуралийнсса вихшалагу ххишала хъанай душиву. Мукунма кIицI лавгунни Иван Сыдоруклул каялувшиндаралу прокуратуралул органнал цикссагу диялдакъашивуртту чIалачIи дуршиву.
Му бакъассагу, прокуратуралул органнал даврил ца яла агьаммур бутIа бур экономикалул ва налогирттал низам къадуручлачиминнащалсса талатавугу.
Владимир Васильевлул кьянкьану баян бунни ихтияр дуруччай органнайн цала мурадрай увкIсса инсан вихну икIан аьркиншиву закондалул ххуллий тIайламур бацIан баншиврий.
Республикалул бакIчинал хъуннасса къулагъас дунни коррупциялул масъаларттахгу.
