[dropcap]Л[/dropcap]аргсса ххуллункьини, июль зурул 28-нний, Москавлив ва православиянал, славяннал рувхIанийсса кюрттан ккаллийсса цаймигу хъунисса шагьрурдай хьунни Русьрал Крещение хьуну (ххачпараснал дин цIакь хьуну) 1030 шин шаврин хасъсса тамансса мероприятияртту.
Москавлив, Собор майданнив, хьунни ва иширан хасъсса литургия. Ва цалчин укунсса даражалий дуллалисса даву духьувкун, гьуртту хьунни 3000 инсан, литургиялул трансляция дунни тIайланнасса эфирданий «Россия-24», «Спас», «Союз» телеканаллал.
П. Рамазанова
Литургиялия махъ Аьрасатнал Президент Владимир Путин бакIчину циняв лавгунни Боровицкаллал майданнивсса мубараксса князь Владимирдул гьайкалданучIан. Тиккусса молебендалий Москавуллал ва щалвагу Аьрасайнал патриарх Кириллул кIицI лавгунни 988 шинал Русьрал Крещение агьали цачIун буллалисса даврил дайдихьу хьушиву ва хIакьину му дата кIицI лаглай бушиву Киеврай, Минскалий, оьруснал, украиннал ва белоруснал аьмсса дин ва культура душиврул агьалинал цашиву цIакь дуллалишиву.
Аьрасатнал Президент Владимир Путиннулгу кIицI лавгунни «православиянал дин инсантурайн хъинбалартту буллан оьвтIутIисса дин душиву ва му диндалул Аьрасайнан азаллийсса шиннардил тарих буллушиву». Ва даталуцIун дархIусса шадлугъру хьунни Душанбайлий, Луганскалий, Белградрай, Къарачай-Чаргаснаву. Байрандалул географиялул исват бунни диндалул дазурду къадикIайшиву.
