Щала Аьрасатнаву баян бувсса «Шинал хушчи (волонтер)» цIанилусса акциялул лагрулий най дуссар щалагу билаятрал даражалийсса «Аьрасатнал шин» тIисса неххардил ва бярдал зумарду марцI дуллалисса акция.
Жулла республикалийгу ТIабиаьтрал сурсатирттал министерствалул сакиншиндарай июньдалул 30-нний хъуннасса субботник дан хIадур хъанай буссар. Акциялул мурадгу неххардил, хьхьирил, бярдал зумардай марцIшиву дуручлансса, ми цIинцIал бакIурдацIа мюхчан дувансса бур. Вай давурттал биялдарай дуссар аьмну экологиялул тагьаргу.
Акция ва кьини нантIиссар кIива кIанай: цавай волонтертал буккантIиссар Редукторный поселокрайсса хьхьирил зуманийн, цавайгу – Сулакьрал чулийсса Кардиологиялул центр бусса кIанттайсса хьхьирил зуманийн.
Ххадижат Ибрагьимова
