[dropcap]В[/dropcap]узирдавун дуклан кьамул буллалисса кампаниялул даву аргъирай дайдирхьу­сса гьантрай на хьунабавкьура Дагъусттаннал паччахIлугърал университетрал математикалул ва компьютердалэлмурдал факультет­рал декан Загьирдул арс Амучи Якьубовлущал.

---

— Амучий, буси вила факультетрая, цукунсса пи­шакартал хIадур бай­ссар зу?
— ЦIанасса ппурттуву Да­гъусттаннал паччахIлугърал университетрал факультетирттава математикалул ва компьютердал элмурдал факультет ца яла тIалавмур бур. Факультетрай хIадур байссар мукьва журалул бакалавриатътал: математика, математика ва компьютер элмурду, фундаменталсса информатика ва информациялул технологияртту, прикладной математика ва информатика.
Мукунма хIадур байссар шанма журалул магистртал. Факультетрай буссар мукьва кафедра, аспирантура ва докторантура.

[pullquote]Махъсса 15-20 шинал мутталий Амучи Якьубов ур математикалул личIи-личIисса олимпиадарттал ва конкурсирттал жюрилул председательну.[/pullquote]

Шикку дуклакисса студентътуран дузал дурну дуссар цинярда шартIру. Мукьвагу кафедралий дачин дурну дуссар студентътурал ва аспирантътурал элмийсса ххал бигьавуртту дуллансса семинардал ва кружокирттал давуртту. Му ба­къассагу, факультетрай буссар физкультура ххираминнансса ххаллилсса спортрал дворец. Так ца жул факультетрай буссар уттизаманнул техникалул щаллу був­сса компьютердал 4 класс ва цIусса оборудованиярттащалсса хъунисса 3 лекцион зал.
Факультетрай дуклай буссар 450-нния ливчусса студентътал. Ххуйну дуклакисса оьрчIал стипендия биллай буссар 10 азарда къурушрайн, социал справкагу духьурча.
— Рязину урав ина дуклан бухлахиминнал кIулшивурттай? ЕГЭ-рдал кумаг буллай бурив хьхьичIунсса оьрчIру ялун личин бан?
— ЕГЭ-рдай лахъсса баллу лавсъсса оьрчIру чIявуми лаглай бур Аьрасатнал вузирдавун буххан. ЖучIан най бур дянив­сса баллу лавсми оьрчIру. Амма ми чIявуми дукккаврих гъира-шавкь дусса, хIарачат буллан ччисса бур.

— Бурив хьхьичIунну дуклакисса, конкурсирттай, олимпиадарттай ххув хьусса, факультетрал цIа бюхттул дуллалисса оьрчIру?
— Пахрулий кIицI лаган ччай ура ларгсса дуккаврил шинал кIия студентънал Пятигорск шагьрулий «IT-планета» тIисса дунияллул халкьуннал дянив­сса программированиялул олимпиа­далий кIива 1-сса кIану бувгьушиву: МахIаммадов Сайгидлул ва МахIамаева Хазибатлул. Мукунма Саратов шагьрулий хьусса 3-D графикалул олимпиадалий 1-мур кIану бувгьунни ХIажиева Маринал. Москавлив хьусса «Шаг в будущее» конкурсрал финалданий 1-мур кIану бувгьунни Нажмуттинова ПатIиматлул. Факультетрал мукьа студент гьуртту хьунни Тюменнай ва Сочилий хьусса дунияллул халкьуннал дянивсса олипиадарттал финалданий.
«От идеи до проекта» тIисса проектрал лагрулий, СКФО-лул регионнал дянив хьусса программированиялул олимпиадалий 30 командалува жул факультетрал командалул бувгьуссар цалчин­сса кIану.
«Аькьлукар» тIисса проектрал лагрулий 500 азарда къурушран­сса 2 грант ларсунни Салимгареев Аьлиханнул ва ЛухIуева Аидал.
Факультетрай дуклакисса студентътураща бюхълай бур чил билаятрайн дуклан гьансса грантру духхин. Мукунсса грантру ларсъсса студентътал буссар Китайнаву Пекиннал технологиярттал инс­титутрал магистратуралуву, хъунисса стипендиярттугу бивхьуну, дуклай. Бур гьашину Китайнавун, Венгриянавун, Румыннавун стажировкалий гьан хIадур хъанахъисса студентъталгу.

— Цукунсса бур зул факультет къуртал був­сса студентътурал бучIан­тIимур?
— ЦIанасса заманнай факультет­рал направленияртту буниялагу тIалавну дур. Шанма курс бувккуну махъ сайки циняв студентътал, дуклайгу бунува, зий бур. Мукунма жул выпускниктал зий буссар республикалул личIи-личIисса идарарттай.

— Циксса бур факультет­рай дуклакисса лакку оьрчIру ?
— Ттун кьурчIи бизлан бикIай жула факультетрайн Ккуллал ва Лакрал районная чан­сса оьрчIру дуклан бухлай бушиву. ХьхьичIва лакрал миллатрал оьрчIру математикалул ва физикалул элмурдал хъинну хьхьичIун ливчусса бу­ссия. Ларгсса шинал ва масъалалул ялув на хьунаавкьура Лакрал ва Ккуллал районнал КIулшивуртту дулаврил управлениярттал хъуними Явсупи ХIамзаевлущал, Альби­на ХIаммакуеващал ва райондалул выпускниктуращал. Барчаллагь учин ччай ура вай каялувчитурахь, дуклаки оьрчIал кIулшивуртту гьаз даву мурадрай дуллалисса давурттахлу. Хъунмасса умуд бур жула оьрчIру, хьхьичIава кунма, кIулшивурттах мюхтажну, цивппа бувхсса вузирдаву хьхьичIунну дуклай, ххалли-ххаллилсса пишакартал хъанан­ссар тIисса.

— Амучий, ина хъуна хьуну ура цIадурксса учительтурал кулпатраву, мунияту язи бувгьухьунссар педагогнал пишагу.
— Ттул бутта Загьир таман­сса шиннардий уссия 2-мур ЦIув­кIуллал школалий директорну зий, нину – Гулбагьаргу вава школалий оьрус мазрал дарсирдал учительну буссия. Кулпатраву бия 5 оьрчI, на ияв яла чIавама.
На 4-мур класс къуртал байх­­­ту, жул нину-ппу бивзуна МахIач­къалалив. Шикку на къуртал бувссар 5-мур школа. 1986 шинал дуклан увхра ДГУ-лул математикалул факультетрайн. Дуклай унува, архIала зий уссияв кафедралий программистну.
1993 шинал ЯтIул дипломрай факультетгу къуртал бувну, зун айивхьура Информатикалул ва математикалул кафедралий. 2003 шинал Саратоврайсса университетраву дуруччав «Дискретная математика и математическая кибернетика» тIисса диссертация. Муния шихуннай ттул канила дуркссар 50-нния лирчусса элмийсса макьалартту, пособияртту ва монографияртту.
2017 шиная зий ура математикалул ва компьютердал элмурдал факультетрал деканну.

Ихтилат бувссар
Имара Саидовал